Friday, October 12, 2007
الفراخ
بالامس فطرت فراخ
وانا باقطع فى لحمها الابيض اللذيذ سرحت فى هذا المخلوق التعيس
المخلوق ده مسكين بشكل
كل فرخه لها نهايه واحده لا تتغير
تتدبح وتتاكل
مخلوق محكوم عليه العيشه فى التقفيصه طول عمره
يبيض يتاخد بيضه مسلوق واومليت
او نسيب شويه يفقسوا كتاكيت ناخد منهم شويه لاكلى الفروج
والباقى يكبر عشان يبيض شوية وبعدين يتدبح وياكله واحد زيى
عمرنا ما سمعنا عن فراخ عايشه فى الغابه مثلا
مع ان سمعنا عن ارانب بريه وجواميس وحشيه وحمير مخططه وحمام رايح جاى من الشمال للجنوب والعكس
لكن الفراخ لو اتسابت فى الغابه حتتاكل فورا
لا عارفه تطير ولا عندها عافيه ولاسنان ولا ضوافر ولا اى حاجه
مجرد صوت
تكاكى وبس
وتأدى دورها جيل ورا جيل عشان احنا ناكل
ولو عيت بشويه انفلوانزا نرش عليهم جاز ونحرقهم
مخلوق مسكين قوى
لكن
مش من ناحيه اخرى احنا فينا شبه من الفراخ؟
تصدقوا
انا لما فكرت كده غيرت فكرى عن الريس
لما كنت افكر فيه بصفته رئيس دوله واحنا شعب كنت احسه فاشل فى كل المجالات
لا تعليم ولا صحه ولاعدل ولارخاء ولا اى حاجه
لكن لما فكرت فيه بصفته صاحب التقفيصه واحنا الفراخ لقيته ناجح جدا
احنا بنبيض وهو بيلم البيض وعايش فى رخاء
عربيات وقصور وطيارات وفلوس
كله من بيضنا
ولما بنكاكى ونزعجه بيهشنا وبنتهش عادى
ولو ديك ولا فرخه منا صوتها عالى شوية ولا مزعج شوية بيدبحه وياكله واحنا ننساه كانه لم يكن
والتقفيصه ما شاء الله فيها بتاع 80 مليون فرخه وبتزيد كل سنه وبيضها بيزيد واللى بيتدبح ويتاكل بالهبل
يبقى ناجح ولا مش ناجح؟
صحيح الفراخ فيه منها الابيض والاحمر والبلدى والكبير والصغير
لكن كله فراخ
طيب تأمل الامن المركزى وهو بيضرب
فراخ ... مش كده؟
والمضروبين وهم بيكاكوا
فراخ برضو ... مش كده؟
حتى كبارات الفراخ
فراخ برضو والله
افتكرت لما الرئيس جاتله وعكه فى المجلس قبل سفرية المانيا
وافتكرت وزير الصحه وهو بيعالج
وشيخ الازهر وهو بيدعى
والاعضاء وهم بيأمنوا على الدعاء ومرسوم على الوش قلق مزيف
فراخ ... مش كده؟
طيب الراجل اللى بنته اتشفطت معدتها فى حمام السباحه وقدم طلب عشان تتعالج
حد عبره؟
تتعالج ايه يا فرخه انت؟
انت تتدبح وخلاص
وجيل ورا جيل
صاحب التقفيصه بياخد الخير كله
والفراخ بتكاكى
Subscribe to:
Post Comments (Atom)
طبعا فيروز يحبها جميع اللبنانيين ولن يجدوا رئيس توافقى افضل منها
وكما جاءت فضيحة الشيخ جبريل من زوجته العرفيه التى فضحته على الهواء وادت الى اختفائه وانصراف الناس عنه يبدو ان الشيخ هداية على وشك ان ينال نفس المصير
![[shp.jpg]](http://1.bp.blogspot.com/_gbZJWhBuajI/RidnqAnzYzI/AAAAAAAAAAc/UyX1Wx2JoQA/s320/smsm.jpg)
![[shp.jpg]](http://3.bp.blogspot.com/_gbZJWhBuajI/RiEmdN8DLpI/AAAAAAAAAAM/mSlbl4nLbJs/s1600/shp.jpg)
![[SeaNightSky.jpg]](http://1.bp.blogspot.com/_gbZJWhBuajI/RiEwpt8DLqI/AAAAAAAAAAU/4wYVAQym3B4/s320/SeaNightSky.jpg)
33 comments:
اولا كل سنه وانت طيب
انا اول ماقريت الموضوع اقعدت اكاكى اقصد اضحك هههههههههه
بجد تشبيه غريب جدا
هو احنا بجد كده ؟
لا ماعتقدش لدرجة
ان احنا نبقى فراخ صعب قوى
عيد سعيد بس بلاش تاكل فراخ فيه عشان متقلبش المواجع على نفسك
تحياتى
هههههههههههههه
يااه يعنى اخرتها فراخ
بس تعرف انا كمان معتقدش اننا فراخ
اصل الفرخه كائن وديع ومسالم قوى
واحنا فينا فصائل تانيه لاتنتمى للفراخ بأى صله
كل سنه وانت طيب
وعيد فطر سعيد عليك وعلى الاسره كلها
دمت بخير
أعتقد أن الاستنتاج الذي وصلت إليه باشبه بيننا و بين الفراخ كبير إلى حد صحيح
كمان كما ألاحظ في الأفلام الأمريكية كلمة تشيكن أي فرخة هي صفة تطلق على الشخص الجبان
دة بيؤكد صحة نظريتك
شفت فيلم الكارتون هروب الفراخ؟ شيكن ران؟
قام فيه بالأداء الصوتي للديك ميل جبسون
بجد لو مكنتش شفته حاول تشوفه
قريب قوي من فكرة البوست و دمه خفيف جدا :)
عزيزي....
عندما أحس الاب بأن أجله قد إقترب
أحضر كرتونه بها عدد كبير من الفراخ
ونده على إبنه وقال له:أرني ماذا تعلمت مني في ال25سنه الماضيه
اريد ك ان تلقي الفراخ وتريني كيف ستقوم بجمعهم وإعادتهم إليها مرة أخرى
إنصاع الإبن لرغبة أبيه وقام بفتح الكرتونه وإلقى الفراخ وما أن إنفك أسر الفراخ حتى أخذت تهرب يمينا ويسارا
والإبن يركض ورأهم ولكن دون جدوى مضى وقت طويل والاب يراقب إبنه ويضرب كفاً بكف
وقال لإبنه:25سنه وما إتعلمتش مني أى حاجه
أعاد الأب بمساعدة الإبن الفراخ للكرتونه مرة أخرى
وهنا أمسك الأب بالكرتونه وأخذ يرجها يمينا ويسارا ثم فتح الكرتونه وألقى الفراخ التى كانت فى حاله من الإعياء الشديد مما سهل مهمة جمعها مرة أخرى فى الكرتونه
وده يؤكد نظريه الفراخ
التى تتحدث عنها
:):):)
تحياتي
يا وايها فراخ
دةحتي الفراخ ليها دور يا هارم
انما احنا فراخ عرجة بعيد عنك مش عندنا اي دور
فراخ فراخ فراخ
فليحيا عالم الفراخ
وكل سنةوانت طيب وسمعني احلي كاكي
أعتقد ان الفراح في موقف أفضل مننا
فهي خلقها ربنا مسخرة للإنسان.. ولحم طير مما تشتهوة
يعني هم ما اتخلوش عن حاجة معينة و استسلموا
لكن احنا ما خلقناش مسخرين إلا لعبادته و عمرات الأرض
لكننا تخلينا
كنت ناوية أعارض أول ما قريت
بس لما فكرت زعلت
كل سنة و انت طيب يا غايب عّي مش عارفة ليه؟
تحياتي
كل سنه وانت طيب وعيد سعيد يارب
بص بقى فراخ ارانب مش مهم النهايه واحده والمهم ان صاحب التقفيصه يعيش ويسيبك عايش جنب الحيط وكده احسن ليك وعجبى :))تحياتى
فى اوائل السبعينات كانوا بيشبهونا بالسمك وطبعا انواعه كتيير واحجامه متدرجة وكنا احنا البساريا لان اقصى ما نتمناه هو الدود او الطحلب الدبلان او جمبرى ابو سته وكنا احنا وجبه شهية للبلطى والبلطى وجبة شهية للقاروص وهكذا لغاية لما القرش ياخد وجبتة المتكلفة -
دلوقتى بقينا فراخ - الفرق ان البساريا كان بصحته ولا طالته المزارع ولا التلوث ولا الهرمون يعنى اكيد كانت صحتنا افضل حتى لو متنا جعانين وما كانتش مستشفى ابو الريش بتستقبل المواليد قبل ما يتولدوا -ودلوقتى ابو الريش ما عدتش مكفيه فعملوا واحدة اكبر على اعتبار ان الفراخ الخربانة صحيا ومتهرمنة يوجدوا لها مكان اوسع يكفيها - المهم ان م الاخر غذا الفراخ مش هايتصلح وهوه ده اللى موجود واللى مش عاجبه يرحل
وبكبكبكييييييييييييييييك
بتفكرني بالرسوم المتحركه
Tom &Jery
لما توم بيشوف جيري فرخه بتجري ادامه
ونفسه تتفتح ليها
والله الفراخ ده نصيبها وقدرها
ربنا خلقها لينا
اما احنا اكيد ربنا مخلقناش علشان كده
وإلا في بلاد تانيه...بره مصر
اللي شبهنا مش فراخ خالص
دول اسود بتعرف تاخد حقها
وتمشي كلامها
مش شويه فرخ تكاكي
هفتكرك كل ما آجي اكلها
وادعيلنا منبقاش كده ولا ده يكون مصيرنا
معلش لسه عندي شويه تفاؤل
رحيل
كل سنة وانت طيبة واشكر تواجدك ومشاركتك للتأمل
تحياتى
عالمى ازرق
تحياتى لكى ولعائلتك ولقومك وياترى الاحوال ايه عندكم؟
كل سنه وانتم طيبيين يا اغلى الناس
Anonymous
يمكن عندنا فرصه اننا مانبقاش فراخ بس الفراخ معندهومش الفرصه دى
واحنا مش عايزين ندفع تمن الفرصه يبقى نستنى فراخ بقى
ولا ايه
تحياتى
لومى
طيب يا لومى الكتاكيت اللى مش عايزه تترج ولا تتبهدل تعمل ايه؟
شكلها كده مش فى ايدها حاجه
مصير تعيس قوى
سمراء النيل
والله يا سمرا انتى بتنورى اى مكان بتروحيه
بحد ربنا مديكى موهبه اشاعه الفرحة فى اى مكان تقربى منه
انا مبسوط بوجودك وتعليقاتك خصوصا بعد الاجازات اللى اخدتيها من التدوين
ما تغبيش تانى لو سمحتى
تحياتى
هانوده
كل سنه وانتى طيبه
مين يقدر يغيب عنك يا هانوده
انتى اللى سبتى المكان مظلم والرحله للمنزل فقدت حلاوتها والنظره لفوق اختفت
عارفه
طول عمرى اسمع كلمه الونس وما اعرفش معناها
عرفت المعنى اخيرا
سهر الليالى
صديقتى الجميله اللى هى صاحبة الجميله اللى هى اخت الجميله
كلامك بقى بيوجع ليه يا ترى؟
مش كلامك هنا
كلامك هناك
باتمنالك كل سعادة الدنيا
بس حتى السعاده عايزه قوة عشان تحصلى عليها
شدى حيلك
وتحياتى الكبيرة جدا لكى
الغالية زوجه المحظوظ
بيتهيألى احنا مش متهرمنين (من الهرمونات)
احنا سرطنونا تقريبا
اصل حتى الفراخ اللى بالهرمون بتبقى كبيره ومتختخه
بس احنا عمالين ننكمش ونتضاءل
وبعد ما كان زمان عصر احجام سهير رمزى وميرفت امين ونجلاء فتحى وصباح وليلى طاهر
بقينا فى عصر احجام حنان ترك ومى عز الدين ومنى زكى
وطبعا نفس الكلام على الرجاله برضو
فين احمد حلمى من رشدى اباظه
ولا ايه رأيك؟
زمردة
ربنا يسمع منك
على اد ما انا متاكد ان التطور الطبيعى اننا نبقى زى بقية خلق الله
على اد ما انا شايف الحركه بطيئه قوى
كأن الزمن مش بيتحرك
عايزه ادلك على حاجه مش حلوة وتسامحينى
حاولى تقرى جرايد قديمه من عشرين سنه مثلا
حتستغربى انها بتقول نفس الكلام
والريس بيقول نفس الكلام
وبيوعد نفس الوعود
وبيبشر بنفس التبشيرات
لا هو عمل حاجه
ولا هو غير فى الكلام
ولا هو قال انا مش قادر ومشى
ولا هو ناوى يمشى
يمكن بقى فى زمن غير زماننا الاحوال تتحسن والفراخ تبقى بنى ادمين
وأنا بقى طول عمري عارفة ايه الونس و بحبه جدا و عارفه انه عزيز
عشان كده بدور عليه و عندي رادار بعرف يلقطه
وسعيده جدا لما عرفت اني أحد أفراد الونس جواك
:)
وكلمة سعيده مش مجرد كلمة و عدت
:)
تحياتي
ضحكتني وما كنش ليا نفس اضحك
فعلا شر البلية ما يضحك
فرخة برضه بس هربانه بالخارج
تحياتي
كل سنة و انت طيب هارملس
جميل جداا البوست ده .. هههههههه
بس و الله انا شايفه ان احنا حتى ما حصلناش الفراخ ..
احنا كتاكيت محبوسين فى قفص و هنفضل كده طول عمرنا .. و غصب عننا
بقول لك ايه ما تقلبش المواجع خلينا عايشين يومين و السلام و يفعل الله بنا ما يشاء
اتفضل زورنا فى المدونة عندنا كحك حلو .. و كل سنة و انت طيب يا جميل
حوريه
فعلا شر البليه مايضحك
يعني الكل فراخ وهو صاحب التقفيصه البني آدم فينا
طب حتى لو كده تخيل أنت 80 مليون فرخه وديك
نطوا مرة واحده عليه وهو رايح يجمع في البيض
وبالمناقير واشتغلوا
هيتبهدل وينتهي امرة
صح
تحيااااااتي
همسات
طيب يا عزيزتى لا ضحك ولا كتابه؟
مش واخده بال سيادتك ان بقالك كتير قوى ما كتبتيش حاجه وكل يوم ابص على مدونتك ومافيش؟
طبعا بوست المعايده ما يتحسبش واللى قبله بقاله خمس شهور
يا ترى ايه اللى شاغلك؟
حورية
كل سنة وانتى طيبه يا حورية
دايما وجود اسمك هنا بيسعدنى
عارفه؟
نفسى اعرف ليه اخترتى مكتوب عشان تعملى فيه مدونتك
سؤال غريب معلش
بس كان الانترفاس بتاعهم متعب لكن كويس انهم حسنوه عن الاول
والان الى الكحك
حاسس ان الكحك عندك ما حصلش
جهزى المائده
سلوى
اجمل ما التدوين ان كل يوم يحمل جديد فى الاصدقاء والافكار والرؤى والشخصيات التى ما كان هناك سبيل اخر لمعرفتها
سعيد بمعرفتك جدا وبدات فى قراءه مدونتيكى
والمقدمات تشير الى نتائج رائعه
اشكرك على اتاحة فرصة معرفة فكرك الراقى ولكى تحياتى
هارملس
انا اخترت مكتوب لانه مبسط و فيه ناس بعرفهم
لو مش مشغول ياريت تساعدنى فى عمل مدونة فى مكان تانى
اكون شاكرة جدااا
و السفرة جاهزة بالكحك يا فندم
انت و كل اصدقاء مدونتك معزومين
مرحبا بكم
حوريه
مش هسمع كلامك
ومش هقرا جرايد قديمه
ولا جديده
لأني بطلت ...توقفت من زمن لما اكتشفت كده
وعرفت ان دنيا الأحلام والآمال
هي اللي فضلالي ويقيني بالله
وان الديك مستني رصاصه
تخلص الفراخ المسكينه
يارب
أشكرك جدا
أخي الكريم
زمرده
انظرى للموضوع على انه تطور تاريخى من تطور تاريخ الامم
صحيح الليل طال وصحيح ربع قرن كتير قوى وصحيح الناس بتجرى واحنا بنتأخر وصحيح الظلم كتير والفقر كتير والحراميه كتير
لكن
كل الامم عدت على الخيبه دى كذا مره فى دورات التاريخ
حظنا بقى اننا فى الحقبه دى
تحياتى
سلوى
الشكر لكى يا اختنا العزيزة
ادام الله الموده والاحترام والتقدير
ذنبنا اننا جينا في الحقبه دي
طب وماله كفايه اننا نتعذب
مش لازم نستنى نشوف اولادنا واحفادنا كمان بيتعذبوا
عذاب جيلنا ...قدرنا ونصيبنا
عذاب اجيال جايه....لسه ممكن يتغير
محاق ..هلال..بدر...هلال ..محاق
وتستمر الحياه
زمردة
حلول مشاكلنا سهله ولا عبقرية فيها ولبست جهنمية او لم يأتى بها الاوائل
حلول مشاكلنا مجربه وقد لجأ اليها من كانوا اقل منا بمراحل فصاروا اسيادنا عمليا فى سنين بسيطه
مثلا
ونحن صغار كانت معلوماتنا عن الكوريين انهم يهيشون فى الاحراش وياكلون الكلاب والغنى منهم يأكل وجبه أرز على الغذاء
اليوم اعلاناتنا وهى تسعى لبيع منتج وترغب فى تحليته فى اعين المشتريين يقولون 100% كورى
فكرتنى يا اخى بالفيلم الكارتونى اللى كان من بطولة الفراخ لما حاولوا يهربوا اكيد يا سيدى هييجى يوم وتحصل ثورة جياع قصدى فراخ احنا نوزع منشورات على كل العشش عشان تبتدى الثورة فى كل مكان فى نفس الوقت
Post a Comment