Friday, October 19, 2007

طعمياية !!!‏

والله عيب عليكم
بلد كبير عريض
تمانين مليون بنى ادم
وجيش وشرطه
ووزارات ومحافظات
وسياحه وتعليم وصحه وقوانين ودستور
وايشى محافظ وايشى وزير وايشى نائب وايشى قاضى

وبعدين افتح الغطا
الاقى بنى آدم واحد!!!!!!‏
بنى آدم واحد يا متخلفين يا مستعبطين!!!!!!‏

بنى آدم واحد هو اللى ماسك كل حاجه!!!!!!‏
هو اللى بيعدل الدستور
هو اللى بيمًلى القوانين بالتليفون
هو اللى بيحدد مين يكسب فى الانتخابات ومين يسقط ومين يتساب لمصيره
هو اللى بيعين قواد الجيوش والقوات
هو اللى بيعين رئيس الوزارة والوزراء
هو اللى بيعين المحافظين والحكم المحلى
هو اللى بيعين النائب العام ووزير العدل ومجلس القضاء الاعلى
هو اللى بيعتقل وهو اللى بيسجن وهو اللى بيخرج المسجونين وهو اللى بيعفو

بنى آدم واحد يا جعانين يا فجعانين!!!!!!‏

طيب خليهم اتنيـــــــــــــــــــــــــــن

32 comments:

عدى النهار said...

دى حتى طعمياية بايتة ومحمرة فى زيت مزرنخ
وفاكرة إن مافيش طعمياية تانية فى البلد كلها تصلح أن تكون معها فى نفس الطبق.. سمعته بنفسى فى تصريح له بيقول لو فى حد فى البلد يصلح لمنصب نائب الرئيس أنا كنت عينته!! يعنى هو ماجبتهوش ولاّدة

Dr. Diaa Elnaggar said...

قرأت التدوينة وسألت نفسي بعدها: لو كان هارملس مكان من ينتقده في تدوينته ومحاطا بنفس الكم من السلطات هل كان سيسلك سلوكا مختلفا عن سلوك من ينتقده؟ فمن ينهي الحوار من جانب واحد بشكل ديكتاتوري كما فعل هو في آخر حوارنا معا في تدوينة الفتنة الطائفية ومن يرد فقط على من يعجبه تعليقهم ولا يرد على المخالفين له في الرأي، لا أظنه يصلح لأن يكتب عن الديمقراطية أو ما شابهها، فكما أن الكلام رزق، فإنه قبل ذلك مسئولية ومصداقية.

رحــــيـل said...

طيب متخليهم انت
حاول واحنا معاك
بس لو حصل فى الامور امور
انا اول واحده هقول معرفوش
ايه ده انت مين؟
هارملس
مسيرها تروق وتحلى
تحياتى

Hannoda said...

حالياأنا جيت من شوية قريت و مشيت ولما رجعت لقيتني مش عارفة أرد على البوست

فقرأته

ولكني سأعود مرة اأخرى فأقرأه عدة مرات

رغم أني استوعبه جدا

ولكن عقلي مرهق لدرجة أني أكيده من أن رأيي الآن لن يصدر من عقلي أساسا

أحييك بشده

و أوعدك بالعوده سريعا

فى القلب said...

ههههههههههههههههههههههههههه

ربنا يحزك
طعميه و فراخ

أيه الكلام السياسى الكبير ده

ههههههههههه
بص مش أدره فعلاً و الله أفكارك جامده جدا

Anonymous said...

ومع ذلك اول حاجة فكرنا فيها بعد شهر صيام هيه الطعمية برغم انها ما زالت بتحمى على قلوبنا وهارية بدنا بس تقول ايه اتعودنا على حفر القنال بالسخرة وكربجة العثمانلية والاتراك والشراكسة و اخد اجرتنا لقمة يومنا يبقى ازاى هانطمع نغير - مهما ثرنا جوانا الفلاح المصرى القديم اللى بيتبع اولوا الامر وبيثق فيهم ولا الاوليه - عارف حاسة انهم لو سابولنا امرنا بايدنا هانتلخبط واحتمال نتكعبل ونقع ونرجع نسلملهم مقلاية وزيت وشوية فول مدشوش علشان ياكلونا الطعمية تانى اصل معدتنا خدت عليها

harmless said...

عدى النهار

صديقى العزيز
معبيين انا وانت من اسمه ايه
الموضوع بقى زى الكابوس
يارب نصحى منه

harmless said...

د. ضياء

اهلا بيك منور المدونه
تحياتى

harmless said...

رحيل

هو حيمشى معاهم حكايه ما اعرفوش دى؟؟
ماكانش حد غلب

القاعده معروفه هارملس ورحيل سوا سوا
ده وقع
مين يسند ده؟
لازم اوقع

مش رجعتى؟؟؟
خلاص

harmless said...

هانوده

فى انتظارك
فى المدونه
وفى الاسكندرية
وفى الرابع
وفى كل حته

بس تعالى

harmless said...

فى القلب

شر البليه ما يضحك
وبعدين طبعنا كده
لازم نتريأ

فاكره اسمه ايه شاعر الهجاء
الحطيئه تقريبا
اللى هجا كل الناس حتى امه
لما عمر بن الخطاب هدده بقطع لسانه لو هجا حد
مقدرش يسكت
عمل ايه
هجا نفسه

فاكر له بيت بيقول
ارى لى وجها قبح الله خلقه
فقُبح من وجه وقُبح حامله

harmless said...

الغاليه زوجه المحظوظ

زينا زى كل الناس فى كل الدنيا
مش زى القول الشائع ان المصريين اتعودوا على الظلم والكرباج ومش حينفعوا غير بكده

اكيد لو حصلنا على الحريه حنرمى الطعميايا وكل طعميايا فى الزباله مش فى بطننا

ولا ايه رأيك؟

دنـيـا محيراني(ايناس لطفي said...

طعميه طعميه
حلو التشبيه ده عندك حق و الله معلشي ربنا موجود و قادر علي كل شيء
تحياتي

Hannoda said...

بما إننا متفقين مع بعض اننا في بلدنا أغراب.. واننا فراخ

بداية من الشعب للمسئولين الصغيرين للأكبر فالأكبر

يبقى منطقي جدا اللي بتقول عليه

وبسخرية شديده قيل اننا بلد ديموقراطي

و الواضح اننا قد نكون اقتربنا من الديموقراطية في ابداء الآراء

أما اتخاذ القرارات فلا صالح لنا به

ولكني أكيده أن تداول الآراء يتطور دوما للإيمان بها ثم الدفاع عنها ثم تغيير الأوضاع كاملة

أشتاق لهذا اليوم فأتفرج على مصر وكل من فيها بفخر

Hannoda said...

أنا داخلت حامية و رديت على طول من غير ما أشوف ردك اللي إنت أكيد عارف
أسعدني قد ايه

:)

Dr. Diaa Elnaggar said...

هارملس،

شكرا، منوره بصاحبها!!!0

تحياتي

ضياء

كاميليا بهاء الدين said...

من أجمل المدونات التى دخلتها مدونتك

انا بجد نفسى فى طعمياية .. اصل مفيش فى المانيا طعمية خالص

اشكرك ياجميل على زيارتى وكلماتك الجميلة

Rosa said...

عيب و عيب اوي كمان

harmless said...

كاميليا

منورة المدونه
واسعدتى صاحبها
ولا حرمنا الله من وجودك الدائم

اسمها جرادا اوزو مش كده؟
انا كنت بانطقها كده اصلى

harmless said...

روزا

طالت الغيبه يا اختنا العزيزة وافتقدنا تعليقاتك الجميله
الحمد لله لوجودك ويارب دايما

Layla said...

ما هما اتنين فعلا...الراجل وابنه...ولا عزاء للشعب الجعان اللي نفس ياكل الطعميتين ومش قادر

harmless said...

marvel

مرحبا بيك
وان شاء الله تبقى آخر طعميايه الطعميايه الحالية

عايزين حاجه عدله بقى

زُمُرده said...

السلام عليكم

ايه الحكايه طعميايه وفراخ
هو انت لسه صايم ولا ايه؟؟
يا خوفي تقولي في العيد الكبير الناس بتضحي
وكل مجموعه بتضحي بعجل كبير
ومعندناش غيره

كل ليل وليه نهايه مهما طال
والعيد قرب قوييييييييي

gohayna said...

الواضح ان رمضان عامل عمايله يا هارملس معاك

اول مره الاقي الاكل دخل في السياسه

الفراخ تحت والطعميه فوق

مش بقولك انك دماغك ملهاش حل ابدا

وان اعجابي بيك في محله

وان دايما عقلك رائع وبيعجبني

بجد يا بخت الناس الي حواليك الي مستمتعين بيك وبتفكيرك الرائع دا

تسلم ايدك والله يا هارملس

هنزل اشوف الي فاتني تاني

ما تيجي معايا

سلوى said...

بالزمه إحنا مالنا حق
هو في حد زيه؟؟
طب في حد بيفهم قده ؟
طب بلاش كده

هو في حد بيخاف علينا وعلى مصلحتنا قده ؟

بوست جميل جدا أخي الكريم
دمت بحفظ الله

loumi said...

عزيزي....

هههههههههههههههه
طعميايه
وبطاطسايه
وبتنجانايه


طبق قاعدة الفزورة
على الثمانيه أسطر قبل الأخيره


الكلاب تعوي والقافله تسير
وكل شىء بأوان


تحياتي

harmless said...

زمردة

العيد الكبير لسه فاضله شهرين الا كام يوم
مافيش تضحيه اسرع من كده شوية؟

متخيل واحد بقاله 27 سنه مسجون وقالوله حتخرج بعد شهرين
برضو الشهرين كتير قوى عنده

harmless said...

جهينة

لولا معرفتى بطيبة قلبك ورقتك ومحبتك للناس ومجاملتك الرقيقه لاصدقائك لكنت ظننت فى نفسى ماليس فى

يا عزيزتى من اى فردوس يأتيك كلامك؟

harmless said...

سلوى

والله يا سلوى كتير فكرت زيك وحاولت اجد تبرير لكل الاحداث لصالح النظام

اتعودت دايما فى اى موضوع انى اتبنى داخليا فكر الطرف التانى فى اى قضيه واحاول ادور على اسباب موضوعية تبرر سلوكه

فكرت فى كل الاحتمالات

يعرف اكتر مما نعرف
فيه مصايب مش قادر يقولنا عليها
فيه ضغوط حتودينا فى داهية وهو مضطر يتعامل معاها
المعارضين اشرار عايزين يدمرونا
الخ الخ

اقصى حاجه
اقصى حاجه وصلتلها
انه ملاك وحسن النيه ويقصد الخير ويتمنى لنا الخير
بس فاشل

لكن الفشل بقى مالقتلوش حل

harmless said...

لومى

ياريت يا لومى كان ده الوضع
دى القافله تتقهقر
والكلاب صامته

مصيبة

جسر الى الحياة said...

والله انت مالكش حل
انت هتكرهنا ليه فى نعمة ربنا

harmless said...

جسر الى الحياة

ربنا يديمها نعمة يا اختنا العزيزة
ده حتى كل الشعب بيحب الطعمية