تسلم يا ابراهيم

يمكن عشان ذاكرتنا ضعيفه مش فاكرين كان الحال ازاى من خمس سنين
كانت ذات الرئيس مقدسه محدش ممكن يتعرض لها
كانت كل انواع المعارضه منصبه على الوزراء ورئيسهم فيما تحت لكن الرئيس كان مش ممكن حد يجيب سيرته

مره مثلا واحد كتب على الحيطه لا للتوريث الشرطه مسكته والنيابه -النيابه اللى هى ضمير الشعب وممثل المجتمع- حبسته والرئيس نفسه اللى افرج عنه

مره واحد تانى راح يبعت تلغراف للرئيس يقوله كفايه, موظف التلغراف نفسه جاب له الشرطه والنيابه -مرة اخرى- حبسته والرئيس -مره اخرى- اخرجه

هكذا كان الحال لو كنا نسينا حتى ظهر هذا الشاب الى ينتمى الى جيل ميئوس منه
بجرأه وبقوه وبشجاعه فائقه وبخفه دم هتف
اى حاجه تحصل لكن لازم نكسر التابوه ده
الرئيس بشر زينا ومسئول عن كل مصايبنا قبل الوزراء والمحافظين ولازم النقد يروح للمكان الطبيعى بتاعه

ابراهيم عيسى كان له السبق الاول فى رفع معول تحطيم التأليه الى تعود عليه المصريون من 52
انا تابعته فى الدستور الاول ثم الدستور الثانى ثم فى برنامج على القهوة الانطلاقه الحقيقيه لدعوته والتى تم منعه بطريقه الضغط على صاحب القناة من ناحية ديونه للبنوك
ثم تابعت سقوط التابوه وعلو الاصوات المعارضه للرئيس من كل الاتجاهات ثم تكوين الجماعات الشعبيه مثل كفايه وشايفينكم الخ

والنظام نادم جدا على انه لم يقضى على ابراهيم عيسى مبكرا
واليوم يخط الخطط ويسن السكاكين للتخلص منه بحيل ديكتاتوريه عفا عليها الزمن
صدقونى ابراهيم عيسى له فضل كبير على الجميع

وتسلم يا ابراهيم