Monday, September 3, 2007

دولة الحمير


كان يا مكان فى حاضر العصر والاوان مدينه جميله كل سكانها من الحمير
وكان يحكم المدينه من مئات السنين قردا ذكيا
واهل المدينه من الحمير لا يعرفون بالظبط كيف وصل القرد الى مقعد الحكم

يتناقلون جيلا عن جيل انهم فى لحظه تاريخيه منذ زمن طويل اجتمع الحمير الكبار واختاروا ان يحكم القرد
ولم تحدد الاقاويل لماذا قرر الحمير الحكماء وقتها ان يحكمهم القرد وظلت هذه نقطه غامضه

ولكنها على اى حال لا تستوقف احد

فالحمير فى هذا البلد عندهم نوع غريب من انفصام الشخصيه
يؤمنون انهم اذكى المخلوقات وانهم عباقره وانهم اصل الحضارات الحيوانيه فى الارض وفى نفس الوقت يشعرون بالدونية ناحية اى اجنبى عنهم سواء حصان او جاموس او خنزير وبالطبع القرد

ربما هذا كان سبب رضاهم بحكم القرد

المهم
مر مائه او مائتان او ثلاثة مائه عام والقرد يحكم وذهبت اجيال وجاءت اجيال والقرد هو هو قائد وزعيم وحكيم واب ورب عائله الحمير

فجأه وفى أمر غير مسبوق قررت الحمير ان تجتمع لمناقشه امر هام جدا
العواجيز والحكماء صاروا يدعون كل حمار الى مكان الاجتماع لمناقشه امر اثاره احد الحمير الشباب ولفت نظر الجميع

الحمار الشاب اكتشف فجأه ان ولا حمار من اصدقائه او معارفه رأى القرد الحاكم
سال اصدقائه وابائه واجداده ولم يقول اى منهم انه رآه
وسرت الحكايه فى كل المدينه وبحث الحمير جميعا عن اى حمار رأى القرد او كلمه او سمع صوته او يعرف شكله ولم يجدوا

وبدأت الشائعات والتساؤلات
هل هناك قرد يحكم فعلا ام انه وهم واسطورة وخدعه لم يناقش الحمير صحتها ابدا

وفى الاجتماع تعالت الاصوات وتكاثرت الاسئله وتزاحم الحمير على الحكماء الكبار منهم يسالونهم الراى والمشورة وظهر سؤال جديد لم يفكر فيه اى احد من قبل
لماذا يحكمنا قرد ونحن لسنا قرود؟

البعض قال لان القرد ارقى منا
ولكن هناك حمار مشاغب يسأل ولماذا يحكمنا من هو ارقى منا؟

وماذا افادنا انه ارقى منا؟
فنحن نعيش فى فقر وكل البلاد حولنا اغنياء
حتى الاكل صار لا يكفى ونحلت اجسادنا وبرزت عظامنا ومريضنا يموت وجاهلنا لا يتعلم

وتطورت الاسئله وتطورت حتى وصلت الى اهم سؤال
باى وسيله يحكمنا القرد؟

وباى وسيله يجبرنا على تنفيذ قراراته؟
وباى وسيله يجبرنا على السمع والطاعه؟

ان اى حمار منا هو جسمانيا اقوى من القرد ويستطيع برفصه واحده ان يطيح به
فلماذا ننفذ القرارات التى ينقلها لنا اصحابه والتى يأخذون بها كل خيرات بلدنا ويتركون لنا الفتات؟


هنا قال شيخ الحمير وحكيمها
انسيتم الشرطه؟
انهم يضربون ويعذبون اى مخالف لاوامر الحاكم

ولكن الحمار الشاب سأل
اوليس الشرطه حمير ايضا؟
وهم مثلنا فقراء ايضا وجوعى ايضا ومظلومين ايضا؟
فلماذا ينحازوا للقرد ولا ينحازوا لنا؟

وصاح الجميع
هناك سر
نختار قرد يحكمنا ونحن حمير
والقرد يأمر جزء منا ان يظلم جزء منا فيطيعه بالرغم انه يعانى مثلنا
والقرد ياخذ رزقنا ويعطيه لبعض الحمير الذين يختارهم ويحرمنا نحن ولا نعرف لماذا اختارهم ولماذا ميزهم عنا وما مصلحته فى فقرنا وجوعنا
والقرد الذى يحكمنا لم يره احد ولم يكلمه احد وربما يكون وهما او خيالا او مجرد تمثال او عروسه يحركها مجهول من بلدنا او من بلد اخر

ما الحقيقه؟
هنا هتف كبير الحكماء وقال
يا اخوانى لتكن الحقيقه ما تكون ولكن السؤال الاهم
ما الذى جعلها حقيقه؟

لا بد ان فينا عيبا
لا بد ان فينا عيبا
من يدلنا على عيبنا؟

احتدم الخلاف وفجأه قال احدهم
انسيتم حصاوى العجوز؟
انه احكم من احكم حمار فينا
اين هو؟

ردت اصوات انه مريض ويحتضر ويا تلحقوه يا متلحقهوش
جرى الحمير الى حصاوى وقصوا عليه القصه وسالوه
هل فينا عيب افسد حياتنا؟
وما هو عيبنا؟

اعتدل حصاوى وهو يغالب الموت وقال
نعم يا اخوانى
ان لدينا عيبا واحدا
عيبا واحدا فقط هو مشكلتنا التاريخيه العويصه ومصيبتنا الازليه
لو عرفناه سنعرف طريقنا ونفهم حالنا ونكتشف علتنا ونعرف لماذا صار هذا حالنا
او على ا لاقل سننتحر ونريح انفسنا

هتفت الحمير كيف يا شيخنا تعرف مشكلتنا وتتركنا فى هذا العذاب
رد الشيخ لانى اعرف انكم لن تصدقونى ولن تناقشوا ولن تقتنعوا ابدا
ابدا

هلل الحمير وقالوا
اخبرنا يا شيخنا وارحمنا
قال الشيخ وهو يسلم الروح

يا اخوانى مشكلة الحمار الوحيده
انه لا يعرف انه حمار

12 comments:

Ma 3lina said...

القرد غطسان و مش عارفين هوا لسه عايش و لا ارتاح و ريحنا

فكرتنى بقصص كليلة و دمنة بتاعة زمان

تفتكر لو حد من الحمير حكم الوضع هيختلف معتقدش علشان هما اتعودوا على كده رضيوا بالهوان و الذل و فضلو حمير

مهو مش معقول كل الحمير مش قادرة على قرد واحد غريبة و الله


عجبتنى حكاية موقف الحمير قدام الجواميس و الحيوانات الاجنبية

عدى النهار said...

مربط الفرس (أو الحمار) فى الجملة دى " يشعرون بالدونية ناحية اى اجنبى عنهم سواء حصان او جاموس او خنزير..." مع إن الحمير لو عرفوا حقيقة حياة الحيوانات الأخرى و خُيّروا بينها وبين حياتهم سيرفض عقلائهم التحول

المشكلة الأكبر أن كبرائهم أكثر إحساساً بالدونية إلا فيما ندر

هم يمكن يحبوا يعيشوا فى الزريبة الخاصة بالحيوانات الأخرى بسبب قُبح زريبتهم ليس إلا

دنـيـا محيراني(ايناس لطفي said...

ههههههه
حلوه جدا
و جايه في وقتها فعلا
يارب الحمير تفهم و تفوق بقي
تحياتي لاسلوبك السهل البسيط الكوميدي جدا
بس كوميدي سوداء

Hannoda said...

الحمار مش غبي
ولا حقير
ولا مابيحسش

الحمار حيوان .. زي أي حيوان
قالوا عنه أنه غبي و مابيحسش لأنه قادر على التحمل بجلد

وطلعت عليه الاشاعة الظالمة
و صدقها
وعاشها
ورضى بيها

نرفزتني جدا جملتك
"وفى نفس الوقت يشعرون بالدونية ناحية اى اجنبى عنهم"

لأنها صح جدا و مش قادرة أفهم ليه .. و بتثيرني جدا لأقصى درجة لما بشوفها فكلام الناس

كان خرجينا أحسن ناس في دول الخليج
شهاداتنا كانت صاحبة الثقة الأكبر هناك

لحد ماإحساسالدونية تأصل فينا
بطلنا نطالب بتعليم أفضل

ما اهتميناش باننا نرفض سياسة التهميش و الاستخفاف بكل شيء

فبقينا أقل الناس و الكل سبقونا

قالوا أصل الفقر بيكسر

بس السودان أفقر مننا و خرجينهم في رؤوسهم علم يحترم

الهند أكتر كثافة و عندها كمية تعادلناأو أكثر من الجهل

لكن عرفت علم و تطور

لا الجهل و لا الفقر حواجز
لكن الاستسلام هو السبب

بوست قوي جدا قلّب المواجع .. خلتني أشتاق قوي لرد حصاوي..

حسيت ان فيهأمل الحمير يلاقوا حاجة يمكسكوا فيها و يطلعوا لفوق

بس السبب اللي عند حصاوي عامل زي حلمة الودان
ماحدش يعرف يشوفها


تحياتي لمحرك العقول الرائع

Fadya said...

انا زبونه هنا
بس ده بقى وشى التانى
يا ترى حتقدر تعرفنى؟

loumi said...

عزيزي....
صدق الشيخ

المجتمعات تتشابه
بشكل او بأخر

فكرتني بكتاب كليله و دمنه اللي ضاع فى البوسطه


تحياتي

harmless said...

ماعلينا

رايى ان اى شعب لازم يبقى من داخله بيلوم نفسه فى نفس وقت لومه لرؤسائه المفتريين

لازم يعرف انه مسئول عن الظلم زيه زى الظالم بالظبط

لازم المقصر يعرف انه مقصر والمتخاذل يفهم انه متخاذل والجبان يكتشف انه جبان

لازم الحمار يعرف انه حمار

harmless said...

عدى النهار

كنت ماشى فى ممطقه محلات وكافتيريات جديده فى الاسكندرية

بداية من اسم المكان
‏(داون تاون)‏
الى اسماء 90% من الكافتيريات والمحلات كلها اسماء اجنبية مكتوبه بالانجليزية

والله كانك فى شارع فى مدينه اوربية
فيه شعور بالدونيه اكبر من كده؟
حزنت وقلت لنفسى
طول عمر الخدم والعبيد بيتمسحوا ويقلدوا اسيادهم

ايه الارف اللى وصلناله ده

harmless said...

دنيا محيرانى

ادعو معك

فانا لا ارى حضيض اكبر من هذا الحضيض
انهزام حضارى وانهزام انسانى وانهزام فى كل جوانب الحياة

harmless said...

هانوده

جارتى الرقيقه اشكرك على كلماتك
مازلت ارفع عينى يوميا وانا فى طريقى الى منزلى ليلا لارى النور المنبعث من الدور الرابع والقى التحيه
بتسمعيها؟

harmless said...

فادية

اهلا من ناحية
ومن ناحية ما عرفتكيش
وبصراحه ما فكرتش وماخمنتش ومادورتش ولا ناوى

ليه بقى؟
عشان سببين
الاول ان الموضوع ده بيبقى اختيارات بين بدائل فبيبقى فيه اطراف تانيه مالهاش ذنب انها تخش فى الموضوع ده

والتانى ان معرفة شخصيتك التانيه او عدم معرفتها هى حريتك الشخصيه ولا اريد ان اقحم نفسى فيها
الافصاح او الاحجام هو قرارك

وعلى العموم لكى تحياتى

harmless said...

لومى

الكتاب يتبعت تانى
ايه المشكله؟

ولو البوسطه بتضيع يبقى يتسلم باليد
ايه المشكله؟

وبمناسبه كليله ودمنه افتكرت المثل اللى بيقول

عين المحب عن عيوب الحبيب كليله

طبعا مالناش علاقه
لا فيه عيوب ولا فيه عيون