الكلام رزق: الانتاج قليل

Tuesday, March 27, 2007

الانتاج قليل

منذ اكثر من 10 ايام اتصفح مواقع اصدقائى
ولا اجد اى جديد من اغلبهم

لماذا؟
هل هو انشغال وقلة وقت؟
هل هو احباط ويأس من حالنا؟
هل هو اعداد وتجهيز؟

لعل المانع خير

بدأت بنفسى يا اصدقائى وارسلت ثلاث بوستات دفعه واحده
فى السياسة
وفى الدين
وفى الحياة الاجتماعية

ارجو الا تصرفكم رساله عن التعليق عن باقى الرسائل

1 comment:

Anonymous said...: المكنة طلعت قماش "فؤاد المهندس"; October 22, 2007 at 3:52 PM

Post a Comment

ومضات

هذا الجزء مخصص لاى خبر او تعليق او طرفة او فكره
وجدت ان بعض الخواطر اقل من بوست
واكبر من ان تهمل

6 يونيو 2008
الحمد لله يوم 5 يونيو عدى على خير كنت مرعوب من السيد الرئيس محمد حسنى مبارك رئيس جمهورية مصر العربية ان يرسل برقية تهنئه لرئيس اسرائيل بمناسبة عيد انتصارها عام 1967

10 ابريل 2008
والله ضحكت ضحك
اصل شر البليه ما يضحك
ضحكت من منظر الشيخ كامل وهو قاعد يدى محاضرات بفلوسه فى قناة ملكه ولناس مأجرهم عمالين يمجدوا فيه وبيتصنعوا الاقتناع والانبهار
سبحان الله

الراجل اللى مش بيعرف يقول كلمتين على بعض من غير ما يعوك ويغلط ويهجص بقى واعظ دين وخبير اقتصاد

آه يا زمن

12 ديسمبر 2007
قال ابن اخت الملك فاروق فى برنامج القاهرة اليوم ان أمه اخت الملك كانت تملك ستة الاف فدان
كل الجالسين جانبى شهقوا من كثرة عدد الفدادين وضخامة ثروتها لكن انا حسبتها
الفدان الان يساوى ربع مليون جنيه على اقصى تقدير واعلى سعر اى ان ثروة أخت الملك باسعار اليوم هى مليار ونصف جنيه
هل يصدق احد ان هذا المبلغ هو ربح أحمد عز فى عشر شهور فقط
وثروته اصلا تقدر باربعين مليار جنيه حتى الان اى بالفدادين يطلعوا مائه وستين الف فدان يضاف اليهم كل عشر شهور ستة الاف فدان جديده

طيب دى أخت الملك
أحمد عز بقى يبقى ابن مين فى مصر يا مصريين؟

21 نوفمبر 2007
يقترح انيس منصور فى الاهرام اليوم ان تتولى فيروز رئاسه لبنان
فرئاسه لينان منصب بروتوكولى فقط وفى نفس الوقت لم تتفق الفصائل اللبنانية على رئيس رغم مطالبتهم بوجود رئيس توافقى
طبعا فيروز يحبها جميع اللبنانيين ولن يجدوا رئيس توافقى افضل منها
المشكله فقط انها ليست مارونية
لكنه اقتراح وجيه جدا

19 نوفمبر 2007

19 نوفمبر 2007
كتب صلاح منتصر فى الاهرام اليوم هذه المقالة

يحكي الوزير الراحل ابراهيم كامل وزير الخارجية الذي صحب الرئيس السادات إلي استراحة كامب ديفيد حيث جرت المفاوضات بين السادات ومناحم بيجين رئيس وزراء اسرائيل بحضور الرئيس الامريكي جيمي كارتر في الفترة من‏4‏ إلي‏17‏ سبتمبر‏1978,‏ أنه ــ أي ابراهيم كامل ــ شعر بأن الاتفاق الذي تم التوصل اليه بعد عناء‏13‏ يوما لا يحقق الأمل الذي يراه ابراهيم كامل فأراد ابراء ذمته وذهب إلي السادات في اليوم السابق علي توقيع الاتفاق وصارحه برأيه كاملا في مشروع الاتفاق‏.‏ لذلك أرجوك واستحلفك ــ هكذا قال إبراهيم كامل للسادات ــ أن تحافظ علي الصف العربي وترفض التوقيع علي مثل هذا الاتفاق المدمر

قال له السادات ــ وأنا أنقل من كتاب ابراهيم كامل حرفيا‏(‏كتاب السلام الضائع‏)‏ قال السادات‏:‏ إنك لاتعلم شيئا عن العرب‏.‏ اسألني أنا‏.‏ إنهم لوتركوا وشأنهم فلن يحلوا أو يربطوا‏.‏ وسيظل الاحتلال الاسرائيلي قائما إلي أن ينتهي إلي التهام الأراضي العربية المحتلة دون أن يحرك العرب ساكنا غير الجعجعة وإطلاق الشعارات الفارغة‏,‏ كما فعلوا منذ البداية ولن يجمعوا علي حل أبدا‏.‏

ثم قال السادات‏:‏ مامعني أن أبقي سيناء تحت السيطرة الاسرائيلية حتي تحل المشكلة الفلسطينية لتغمرها اسرائيل بمستوطنات جديدة يوما بعد يوم‏.‏ أليس هذا من الغباء؟ انك تتكلم لأنك لاتعرف شيئا عن أحوال مصر الداخلية‏.‏ لقد ترك لي عبدالناصر تركة مثقلة بالهموم والمشاكل‏.‏

وإن أوضاعنا الاقتصادية والاجتماعية في غاية السوء وكل مرافق البلد منهارة ولن تستطيع مصر أن تخرج من أحوالها المتردية إلا إذا حصلت علي السلام وكرست كل مواردها للتنمية‏,‏ وعندئذ ستكون مصر في مركز أقوي لمساعدة الفلسطينيين في حل مشكلتهم‏.‏

ورفض ابراهيم كامل منطق السادات وقدم استقالته حتي يغسل يديه من جريمة توقيع كامب ديفيد‏..‏ وفيما بعد وقبل ان يتوفاه الله تراجع ابراهيم كامل وأعلن أن السادات كان علي حق‏!‏

4 نوفمبر 2007
والله احيانا باشك فى نفسى وانا باسمع الخطب الاخيره للرئيس
باقول لنفسى معقول الكلام ده بيقوله اللى بقاله 27 سنه بيحكم؟
ده كلام رئيس جديد بيصلح المصايب اللى عملها الرئيس اللى سبقه
انا بقيت احس ان الرئيس بقى اكبر معارض للرئيس
كل كلامه بيحكم بالفشل على السنين الطويلة اللى فاتت وبيقول ان (اللى كان بيحكم قبله من عشر سنين كده) كان ماشى غلط وهو سبب كل الازمات اللى احنا فيها

وزير المالية امبارح بيقول ان الاقتصاد كان انهار سنة 2004 لولا انهم لحقوه
يانهار مش فايت
لو بيكدب يبقى ما ينفعش يبقى وزير بيكدب
ولو صادق يبقى ما ينفعش الحزب بتاعه ولا الحكومه بتاعته ولا الرئيس بتاعه وبتاعنا لانهم هم اللى وصلوا الاقتصاد للانهيار بعد 23 سنه من حكمهم

ياترى الناس دى مش بتعرف تتكلم
ولا احنا مش بنعرف نفهم

22 اكتوبر 2007
آخر الاخبار
هناك 22000 مصرى فى اسرائيل يعملون فى الاقتصاد الاسرائيلى ويدفعون الضرائب لحكومه الصهاينه ومتزوجين من حاملات الجنسية الاسرائيلية واولادهم سيخدمون فى الجيش الاسرائيلى

الخبر المهم بقى انهم شكلوا رابطة اسمها
رابطة المصريين فى اسرائيل
ولما اتسألوا قالوا هى جت علينا؟
ما المصانع شغاله والمهندسين الزراعيين رايحين جايين والغاز بيتباع لاسرائيل ورجال الاعمال بيجروا ورا الكويز

صحيح
الناس على دين ملوكهم
وبركاتك يا حنفى

5 اكتوبر 2007
فيه نشره عن منظمه الصحه عن متوسط الاعمار بتقول ان لغايه اوائل القرن العشرين كان متوسط عمر الراجل 43 سنه والست 48 سنه
تخيلوا
الراجل 43 سنه بس
والست 48 سنه بس
لكن الحمد لله الطب اتقدم والمتوسط بقى فى السبعينات
وده خلى طبعا جمال باشا وهو فى اخر سن القرن الماضى لسه بيبدأ حياته الزوجيه ولسه سيرزقه الله -ان شاء الله- بالخلف الصالح ولسه بيفكر ويخطط وبيرسم عشان وظيفه عشان لسه يبدأ حياته العملية
غريبه قوى مش كده

الاغرب ان يسرا وهى فى الستين
يعنى كان زمانها ماتت من 12 سنه
لسه بيغتصبوها

4 سبتمير 2007
   كيف كان الازل قبل ان يكون هناك ازل؟
   وكيف يكون المكان لو لم يكن هناك مكان؟
   وكيف كان المنطق عندما لم يكن هناك قوانين؟
   وكيف يكون اى شئ لو لم يكن ماده ولا صورة منها؟
   وكيف يكون الخلود عندما لا يكون زمن؟
   وكيف كان ما وراء الكون عندما لم يكن هناك كون؟
   وكيف كان الله كل شئ عندما لم يكن هناك شئ؟
   الله فقط بدون كون وبدون زمن وبدون ماده وبدون منطق
   بدون قبل وبدون بعد وبدون امام وبدون خلف وبدون فوق وبدون تحت؟
   واحد ليس معه احد
   احد لا يتكون من ابعاض
   هل يدرك المنتهى اللانهاية؟
   هل يفهم المحدود المطلق؟
   ملعون العقل والمنطق والمرض والحمى والهلوسه

3 سبتمير 2007
   لم يخلص لامرأه ابدا
   ولم يخن امرأه ابدا

   فقط
   كان له تعريف مختلف للخيانه
   وتعريف مختلف للاخلاص

   دائما كان حبه للصنف
   يغلب حبه للحبيبه

   ولما عرف كبف يحب
   وعرف كيف يخلص
   وعرف كيف يزهد
   ويكتفى
   ويرضى

   ادار له الحب ظهره
   وزهدت فيه الحبيبه
   وعرف ذل ان يكون
   مرفوضا

19 اغسطس 2007
ارشح لكم هذه المقاله التى نشرت فى المصرى اليوم أمس بقلم الدكتور سعد الدين ابراهيم

19 اغسطس 2007
   لا تظنى لحظه انك خسرتى معاركك
   او خابت توقعاتك
   او خذلك ناسك
   او فقدتى تأثيرك
   لا والله
   كل الخيوط فى يدك
   وكل محاولات التمرد فاشله
   وكل الافكار الثورية خائبه
   ومن مسك لحظة لا يحيا بدونك

15 اغسطس 2007
الى كل رجل يريد ان يبكى عجزه وقلة حيلته
الى كل امرأه لها ابن ترعاه وتخاف عليه
الى كل عقل لا يفهم كيف يفكر الساديون والمجرمون والسفاحون وزبانية التعذيب الذين لا يفرقون بين رجل وشيخ وامرأه وطفل
الى كل من يريد ان يعرف ماذا ينتظره او ينتظر اولاده فى المستقبل
ادعوكم لرؤيه هذه الصور عند الاستاذ وائل عباس

13 اغسطس 2007
يادى المصيبه
هو مافيش حد سليم خالص؟
كمان الشيخ محمد هداية اللى هرانا مواعظ وحكم ونصايح وتحذير وترهيب طلع مانع مطلقته تشوف اولادها من سبع سنين ومش مديها حقوقها الشرعية ومدوخها فى المحاكم وبعد ما اخدت احكام بالنقفة بمبلغ تافه (بالنسبه له طبعا) برضو مش عايز يدفع وشكله حالف مية يمين انه يبهدلها ويشردها

شكل كل كلام الترهيب والنحذير من اكل حقوق الناس وظلم خلق الله والافترا على المستضعفين وباقى الكلام الكبير الذى خرج من فم الشيخ وذهب الى اذان الملايين لم يذهب اليه بعد

ويبدو ان تذكيره لنا ان جميع ايات القران تنسب بيوت الزوجيه للنساء وليس الرجال دائما القرآن يقول بيوتهن بيوتهن وقد علمنا الشيخ هذا ولكنه لم يتذكره وهو يشرد زوجته وام اولاده

وكما جاءت فضيحة الشيخ جبريل من زوجته العرفيه التى فضحته على الهواء وادت الى اختفائه وانصراف الناس عنه يبدو ان الشيخ هداية على وشك ان ينال نفس المصير
بالمناسبه ده حتى اسمه ما طلعش هدايه
ده اسم سبوبه بس
انه عالم زيف وتزوير اللى احنا عايشين فيه
اقرأ الخبر هنا

8 اغسطس 2007
مفاجأه
هند الطفله التى انجبت طفله ليست بريئه وليست طفله
والشاب الذى اتهمته اثبت تحليل الـ DNA براءته
والفتاه اتضح انها سته عشر عاما وليست احدى عشر والتحريات اثبتت ان الفتاه لها علاقات متعدده مع العديد من الشباب الذين اعترفوا بممارسه الجنس مع الفتاه مع الحفاظ على عذريتها !!!!!
وهى عذراء حتى الان !!!!!!!

والاب اخذ شقه من المحافظه واموال طائله من التبرعات وكان يفرض رسما لاى مقابله صحفيه او فى قناة فضائيه للمتاجره بالفضيحه وقد اتصل به محرر المصرى اليوم على اساس انه قناة فضائيه ونشر نص الفصال الوضيع

وانا شخصيا لن اتعجب اذا ثبت مستقبلا ان الاب هو الفاعل كما ترى احدى الصديقات المدونات ذات الخبره والبصيرة

والشاب المظلوم المحبوس حاليا فى انتظار موعد جلسه للافراج عنه والذى نال كراهيه الملايين الذين طالبوا باعدامه وحرقه فى ميدان عام
بـــــــرئ

هذا درس لنا جميعا لنتذكر ان البشرية شقت كتيرا ولمئات السنين لتصل الى بعض القواعد البسيطه التى مازلنا نرفضها احيانا
ومنها المتهم برئ حتى تثبت ادانته

الصوره من مدونه الاخت العزيزه فريدة والتى كتبت مقالا ناريا عن الموضوع بعنوان لان مصر مافيهاش رجاله

23 يوليو 2007
والله لم اصدق عينى ولم اصدق اذنى
فى تقرير لبرنامج القاهره اليوم عن احداث قسم المنتزة والاربعون شخص المحتجزين استضافوا احدهم الذى قص ظروف احتجازه وكيف احضروا ابنتيه واحدى حفياداته واحتجزوهم جميعا بدون اكل وشرب وقص كيف ان النيابه انقذتهم بعد خمسه ايام من الذل والمهانه والجوع
وبعد اربعة وعشرون ساعه فقط
ظهر نفس الرجل فى تقرير لبرنامج العاشرة مساءا يقص علينا ما الذى حدث فقال انه وجد المعركه دائرة فى القريه فذهب بنفسه للقسم فاستضافوه ورحبوا به وهيئوا له الاقامه حتى تهدأ الامور وكان يذهب ويجئ براحته ولم يكن هناك احتجاز ولا دياوله

والله لم اصدق ان هذا الشخص هو نفس الشخص بتاع امبارح حتى جاءتنى رساله على الموبايل من لومى تتعجب من نفس الرجل
يا ترى حصل له ايه خلاه يغير كلامه 180 درجه فى 24 ساعه
ويا ترى الناس دى هبلة ولا فاكرينا هبل ولا ايه؟

10 يوليو 2007
شوية اسئله طفوليه قوى
    * ازاى الانسان بيضحك - بيحصل ايه يعنى؟
    * ازاى الانسان بيعيط - بيحصل ايه يعنى؟
    * ازاى الانسان بيتزغزغ - بيحصل ايه يعنى؟
    * ايه الزغطه؟
    * ايه الأرف وايه سببه؟
    * عباره عن ايه القشعره اللى بتيجى من الحك على القزاز؟
    * ليه لازم الانسان ينام مش بس يرتاح وايه النوم؟
    * تعليم المشى تعليم مين لمين - المخ بيعلم نفسه؟
    * ليه السم بيموت؟
    * ليه حد يحب حد بالذات بالرغم انه بيقرفه فى عيشته؟

8 يوليو 2007

          تانى القلم؟
          تانى الألم؟

          امتى يا عم حتفهم
          ان اللى كان كان؟

          امتى يا ذكى حتعلم
          ان مافيش أمان؟

          امتى بقى تتمرد
          على ضعف القلوب؟

          امتى ترفض امتى
          تتحدف بالطوب؟

21 يونيو 2007
ارشح لكم هذه المقاله التى نشرت فى المصرى اليوم أمس بقلم الاستاذ جمال البنا

21 يونيو 2007
          الايام بتجرى بسرعه
          والنهار ابتدى يقصر تانى
          فينك يا ايام الشتاء الجميلة

18 يونيو 2007
نكتة جاتلى على الموبايل
واحد ماشى فى الشارع عمال يقول
الله يخرب بيتك يا حنفى
الله يخرب بيتك يا حنفى
الله يخرب بيتك يا حنفى
جه عسكرى ماسكه ولطشه على قفاه وقاله
كمان مش عارف اسم الريس؟

17 يونيو 2007

باقلب فى التليفزيون لقيت سهير رمزى مع صفاء ابو السعود متحجبه حجاب غريب وبتتكلم فى الدين والحج والاحاديث والقرآن
الخلاصه تابت وانابت وحتخش الجنه ان شاء الله
بعد ما بوظت جبلنا كله حتخش الجنه!!!!!
الاف المراهقين اللى باتوا يحلمون بمشاهد افلامها المليئه بالنهود والافخاذ والتنهيدات والتأوهات ويحتضنون صورها المخله جدا جدا فى مجلة الشبكه ومجلة الموعد التى كانت تقص فيها قصص مبتذله جدا جدا عن زوجها السابق الثرى الكويتى
الاف الشباب الذين اهدروا وقتهم واهملوا دروسهم وفارت دمائهم وتعلموا (العادات السيئه) ومنهم من انطلق مسعورا يتحرش بالبريئات
ولكن الله يقبل التوبه لا شك ويستبدل السيئات بالحسنات لا ريب
وامتنع علينا لوم الحاجه سهير كما امتنع علينا لوم الحاجه شمس والحاجه البابلى وكل الحاجات ولم يبق لجيلنا الا ان يلوم نفسه ويحذر الجيل الحالى من الزومبه اللى ح ياخدها لما هايفا ودولى وماريا وغيرهم يكسبوا الملايين وبعدين يتوبوا ويخشوا الجنه ويسيبوكم فى دنيا الصور والافلام
وبعدين يا حاجه سهير مش اللى يتوب يسدد حقوق الناس اللى ضيعهم
باسم جيلى اناشدك
عايزين حقنا

16 يونيو 2007

يانهار اسود ومنيل ومطين ومزفت ومهبب ومضلم وحالك ومش طالعله شمس
اكتر من 100 قتيل؟!!
فيه ايه ممكن يتقال؟
لا حول ولا قوة الا بالله
وحسبنا الله ونعم الوكيل

10 يونيو 2007
ضرب ظابط امن الدولة د. ياسر عضو مجلس الشعب وسحله على الارض ومزق ملابسه وعندما قال له انه نائب فى المجلس رد عليه احنا فوق الكل والمجلس كله و فتحى سرور على الجزمة
تفتكروا الظابط قال حاجه غلط؟

5 يونيو 2007
معقول اغنية تثير كل هذا الشجن؟
معقول اغنية تبكى عشرات الملايين؟
معقول اغنية تجسد الذل والهزيمة والانكسار والجروح والصدمه والخديعه والاستهتار بالشعوب
حكى لى الكثيريون من معظم البلاد العربيه من اباءنا الذين عاصروا هذه الهزمية البشعه كيف كانت الامه العربيه كلها تسمع هذه الاغنية وتبكى

اجتمع اكبر العباقره كل فى مجاله
عبد الرحمن الابنودى فى الشعر وبليغ حمدى فى الالحان وعبد الحليم حافظ فى الغناء
اجتمعوا وسط الالم والهزيمة
وخرجت الاغنيه مختلطه بدماء الشهداء وبطين سيناء ويقهرة الشعب

عدى النهار
اسمعها هنا
او اقرأها ها هنا
   عدّى النهار .. و المغربية جايّة
   تتخفّى ورا ضهر الشجر
   و عشان نتوه في السكة
   شالِت من ليالينا القمر
   و بلدنا ع الترعة بتغسل شعرها
   جانا نهار مقدرش يدفع مهرها
   يا هل ترى الليل الحزين
   أبو النجوم الدبلانين
   أبو الغناوي المجروحين
   يقدر ينسّيها الصباح
   أبو شمس بترش الحنين؟
   أبداً .. بلدنا ليل نهار
   بتحب موّال النهار
   لما يعدّي في الدروب
   و يغنّي قدّام كل دار
   و الليل يلف ورا السواقي
   زي ما يلف الزمان .. و على النغم
   تحلم بلدنا بالسنابل و الكيزان
   تحلم ببكرة .. و اللي حيجيبه معاه
   تنده عليه في الضلمة و بتسمع نداه
   تصحى له من قبل الأدان
   تروح تقابله في الغيطان
   في المصانع .. و المعامل ..
   و المدارس .. و الساحات
   طالعة له صحبة .. جنود
   طالعة له رجال ..
   أطفال .. بنات
   كل الدروب واخدة بلدنا للنهار
   و احنا بلدنا ليل نهار
   بتحب موال النهار
   لما يعدي في الدروب
   و يغني قدّام كل دار

3 يونيو 2007
الغت د عائشة بروتوكول الخادمات
ولكن ليست هذه المصيبه
المصيبه لم يشعر بها احد ولم يتكلم فيها احد
باختصار
هل تتخيلوا ان الاتفاقية كان ممكن ان تكون بالعكس
ان تكون بخصوص خادمات (او مديرات منزل) سعوديات فى البيوت المصرية
لا اعتقد ان احد يمكنه ان يتخيل هذا
وهذه هى المصيبة الحقيقية
مصيبتنا الحقيقية انه صار من المنطقى ان نعمل خدما وخادمات فى السعودية وليس من المنطقى العكس

هذا ما فعله النظام بنا
صار طبيعى ان نكون خدما وخادمات او عبيدا وإماء او غلمان وجوارى لدى السعوديين او غيرهم
يا اخوانى دارت علينا الدنيا فاحزنوا
كما كان زمان من المنطقى وجود جوارى حبشيات فى بيوت البشوات
وكما ان حديثا مقبول وجود ملك يمين من الفلبين والبنجلاديش فى الخليج
صار اليوم طبيعيا ومنطقيا ان تباع المصريات للعرب سواء بعقود زواج صورية وهذه حيلة الدهماء او بعقود رسمية وهذه حيلة الحكومة

    اخوانى لا تنسوا ابدا
    صرنا لائقين للعمل خدما
    سواء عملنا او لم نعمل

29 مايو 2007
الخبير الانجليزى جون برادلى فاهم اوضاعنا بطريقه مذهله يمكن اكتر من من حكامنا انفسهم
هذا ملخص اراءه ومعظمها صحيحه بنسبه كبيرة

* مصر تتجه إلي هاوية.. لاحظت التدهور السريع في كل القطاعات.. فالغني يزداد ثراء، والفقير يزداد فقرا، والهوة بين الشعب والنظام تزداد اتساعا.

* هناك شيء ما لا أستطيع تحديده.. مزيج من الإحباط والغضب واليأس منتشر في كل مكان، مصر الآن قريبة من حدوث تغير دراماتيكي، والمصريون يعيشون فترة مثل تلك التي سبقت ثورة 1952، ومثل التي سبقت اغتيال السادات.

* أتمني أن يستيقظ النظام ويدرك أنه حوّل شعبه إلي عدو قبل فوات الأوان.

* أعتقد أن آخر شيء تحتاجه مصر وتريده الغالبية العظمي من المصريين هو ثورة عنيفة.

* لا يهم من سيحكم مصر مستقبلا.. لأنه سيكون مستبدا مثل سابقه، وسيستمر أغنياء الحرب في سرقة البلاد حتي تنفد خيراتها.

* أعتقد أن النظام نفسه يجب تغييره وليس الأفراد، لأن من تفرزه الانتخابات، حتي ولو كانت نظيفة وشفافة، سيظل علي رأس نظام فاسد.

* النظام أكبر كثيرا من الشخص وسيلقيه ويسحقه بلا رحمة حتي لو كان إصلاحيا.. مادام هذا النظام فاسدا.

* حال أمريكا مع النظام المصري.. أن الأخير كشف أوراقه ونفذ كل ما تطلبه منه أمريكا منذ السبعينيات مقابل المعونة، وقد فازت واشنطن لأن مصر لا تملك «الكارت الرابح».

* علي أي حال.. النظام المصري مثل كل الأنظمة لا يهتم سوي ببقائه في الحكم، والأمريكيون يدركون ذلك جيدا.

* أما السعودية.. فقد حافظت علي بقاء كروتها قريبة جدا من صدرها، ويملك السعوديون الكارت الرابح ويستخدمونه حينما تتعقد الأمور دبلوماسيا علي المستوي الدولي.. وهو النفط.

* النظام المصري لا يملك هامشا للمناورة أو المزايا في علاقته بالولايات المتحدة الأمريكية، وحينما يتحدث عن العراق أو الفلسطينيين لا يهتم الغرب، لأن الجميع يعرف أن النظام المصري سيقف بجانب أمريكا مهما حدث.. مادام هذا يضمن بقاءه في السلطة.

* لا أعتقد أن هناك تنافسا بين الرئيس مبارك والعاهل السعودي الملك عبدالله.. لأن كليهما مشغول بأشياء أخري، وكليهما ليس مهما علي الإطلاق، وأري أن التاريخ لن يذكرهما كقائدين عظيمين.

* تبقي المنافسة قوية بين مؤسسة الأزهر، السنية المعتدلة، وبين السعودية، بمنهجها الوهابي المتشدد.. وتاريخيا مصر هي الأقوي، لكن صعود السعودية في الفترة الحديثة تزامن مع تراجع مصر، خصوصا بعد ارتماء الأزهر في أحضان النظام العسكري.

* مصر علي المدي الطويل ستنتصر مجددا.. وعلينا فقط أن ننتظر حتي ينتهي النفط من السعودية.

* إن ما فعله الملك عبدالعزيز آل سعود والرئيس الراحل جمال عبدالناصر في السعودية ومصر، لا يمكن مسامحتهما عليه، فقد قتلا كل شيء جميل، واستبدلا به ما هو سييء

26 مايو 2007
وزيرة الغلابه الهمامه اتفقت مع السعودية على توريد 120 الف خادمه مصرية للعمل فى بيوت السعوديين
خلاص يا اخوانا
نظام حكمنا وصل لاخر مرحلة معانا
خلانا فلبينيين
وحسب الفتاوى اياها
الخادمات غالبا حيبقوا ملك يمين للاخوة السعوديين والباقى معروف
بجد بجد
الله يخرب بيوتكم

24 مايو 2007
الجماعة بتوع سيناء هدوا الشادر وضربوا كرسى فى الكلوب وضربوا نار من مدافع رشاشه
فقط عشان صورة رئيسنا المحبوب متعلقه
امال لو كان هناك بنفسه كان حصل ايه؟

وبعدين ده واخد حاجه وثمانيين فى الميه فى الانتخابات وكل ما اسال اى فئه الاقيهم لا انتخبوه ولا عايزينه, انا قلت يمكن اللى انتخبوه بتوع سيناء اصل دول الوحيدين اللى ما ماسألتهومش
طلعوا مش هم برضو

23 مايو 2007
بمناسبة اغلاق ملف العبارة فى مجلس الشعب
ربنا يورينا فيهم يوم

19 مايو 2007
رئيسنا المحبوب مبارك عاصر ريجان 7 سنوات وعاصر بوش الاب 4 سنوات وعاصر كلينتون 8 سنوات وعاصر بوش الابن 7 سنوات ده حتى الان
ربنا يطول عمره

اما بقى اخونا القذافى فقد عاصر عبد الناصر سنه والسادات 11 سنه وحسنى مبارك 26 سنه حتى الان برضو

ربنا يطول عمر الجميع

16 مايو 2007
تخيل نفسك وزيرا للتعليم
وذاهب لزيارة مدارس قنا
وعند وصولك وجدت تلاميد ابتدائى الاطفال فى انتظارك فى شمس قنا الحارقه

يا ترى ماذا سيكون رد فعلك؟
هل ستكون مسرورا بشخصيتك سعيدا بمحبه التلاميذ لك مزهوا باهميتك
ام هل ستفهم ان كل تلميذ يلعنك وبلعن اليوم الى خلاه ييجى المدرسه
ويسب كل ناظر ومدرس اجبره على الوقفه فى الشمس الحارقه

هل ستعطى النظار والمدرسين الذين نظموا التشريفه ورصوا التلاميذ وحفظوهم هتافات الترحيب واناشيد التبجيل مكافآت وترقيات وهل ستهش لهم وتبش فى وجوههم وتقبل المصحف الهديه شاكرا حامدا
ام هل ستحيلهم الى التحقيق بتهمه ايذاء الاطفال وتعريض حياتهم للخطر وبتهمه النفاق والنصب واضاعه الوقت
ثم
ماذا ستفعل ايضا اذا علمت ان احدى التلميذات المسكينات اصابتها ضربه شمس وماتت
ماتت يا وزير التعليم عشان تنبسط حضرتك بالتشريفه وينبسط الناظر والمدرسين بابتسامه رضا من سيدهم
ماتت وتركت لكم دنياكم القذرة
ماتت وتركت ام ثكلى واب هو ميت من زمان من الرعب والخوف والقهر والفشل فى حماية فلذه كبده

ماذا تفعل لو كنت مكان وزير التعليم
هل ستكون انسانا
ام تكون يسرى

15 مايو 2007
معقول؟
معقول مش فاهم يعنى ايه جسر يربط بين السعودية ومصر؟
معقول مش عارف ازاى سهولة التنقل بتحيى مناطق وتنشأ حضارات وتقيم دول وتغير مجتمعات وتقوى علاقات وتخلط ثقافات؟
معقول مش عارف معنى جسر يحيط بالعدو ويهدده من كل الاتجاهات؟
معقول مش متخيل راحه الملايين التى بتنتقل بحرا بين البلدين والامان اللذى سيتحقق لهم وهم بعيدون عن عبارات اللصوص واعوانهم؟
معقول مش حاسب القيمه الاقتصاديه والخير الذى يحمله انشاء مثل هذاالجسر والتوفير فى سعر السلع وتنشيط التجارة بما يساوى الف شرم شيخ هذا (اذا كانت شرم الشيخ ستتأثر اصلا)؟
ام
المعقول انه فاهم لكن الديكتاتوربة والانفراد بالقرار صارت جهرا و العداء للشعب المصرى صار علنا
-------------
الحمد لله
بعد ان استسلمت لليأس سنوات يبدو ان الحق يأبى ان يموت
يسلم لسانك يا د سليم العوا
يسلم لسان كل من اتصل عشوائيا وقال رأيا
استمتعت الى كلام العلماء والى كلام الشعب
لم يشذ احد من هذا وذاك ان اسرائيل عدونا الابدى واننا لن نسمح ان تذهب ارض المسلمين الى اولاد القرده واحفاد الخنازير
وان مهما طال الزمن ومهما احلك ليلنا لن تنتازل عن حق الله وحق المسلمين فى ارضهم
اخيرا لم اسمع السؤال الجبان المتخاذل يعنى نحارب؟
ولا السؤال الاضعف يعنى ترضى تبعت ابنك يحارب؟
من يحارب اذا لم نحارب نحن واولادنا
ومتى نحارب اذا لم نحارب من يأخذون ارضنا ويهدموا مساجدنا ويقتلوننا ليل ونهار
وحسن فعل العوا ان ذكرنا بكلام الله الذى ليس له تبديل اننا اذا تولينا استبدلنا الله بقوم لا يكونوا امثالنا ونذهب نحن الى مزابل التاريخ
ربنا لا تجعلنا من المتوليين

5 مايو 2007
بمناسبة اختيار عجائب الدنيا السبع الجديده
خطر لى سؤال عن لو فكرنا فى اختيار المستحيلات الجديده بدلا من المستحيلات الثلاث المعروفه
الغول والعنقاء والخل الوفى
والمستحيلات هى ما لم تكن ولم تكون ولن تكون وكانت استحالة ان تكون
وبهذا المعنى لن نعدم مستحيلات
مثلا
    عدل مبارك
    امومة سوزان
    ضمير سرور
    شرف صفوت
    شعبية جمال
    رحمة العادلى
كلها مستحيلات المستحيلات

3 مايو 2007
اليوم 3 مايو بقالى شهرين كاملين فى التدوين
الوقت بيعدى بسرعه قوى

2 مايو 2007
سبحان الله
ده فيه فرق كبير قوى فى الثقافات والعادات
تقريبا الدنيا باظت او اتجننت او انقلبت احشاءها
روايال مرشحة الرئاسه الفرنسيه عايشه مع عشيق بدون جواز ومخلفه منه اربعه كلهم ولاد حرام (خليها ابناء غير شرعيين)
عادى؟
وساركوزى منافسها مراته المصونه هربت مع عشيقها فى فسحة امريكية والظاهر والله اعلم ان النداله مالهاش جنسيه فلما العشيق (اخد منها اللى هو عاوزه) سابها والزوج الجدع قوى اتحايل عليها ترجعله فرجعتله
بس ايه؟ راسها فى السما واحاديثها فى الصحف جامده قوى
ما شاء الله
شعوب الزناة فى المقدمه

ا مايو 2007
القذافى بيطالب ايطاليا بالكشف عن مصير خمسه الاف ايطالى تم نفيهم لايطاليا اوائل القرن العشرين
ويطالب باجراء تحليل الحمض النووى لجميع الايطاليين حتى يتم معرفه سلاله الليبيين منهم لتخييرهم بين الحياة فى ايطاليا او العوده للوطن الام الجماهيرية العظمى

يخرب عقلك يا قذافى مابقاش فاضل حد بيضحكنى غيرك

22 ابريل2007
الصورة مؤلمة اكيد
ولكن فيها من معظمنا
كلنا ناء باحماله
ولكننا اعتدنا على العذاب حتى تخيلنا ان كل المخلوقات يحملون ما نحمله
ربما لا نكتشف مصيبتنا الا عندما نزور بلادا اخرى
عرب او عجم او فرنجه
ونرى كيف ان الحياة اسهل
والاعباء ابسط
والانسان انسان
ونحن حياتنا ازمات متتاليه
مثلها مثل السقطات المتتالية
نخرج من ازمه لازمه
ومن ضيق لضيق
انظر الى هذه الصورة وتساءل
يا ترى ما مشكله هذا الحمار؟
مشكلته اكيد هى مشكلتنا كلنا
فكرت كثيرا واقتنعت ان مشكلة هذا الحمار ليست فى اعباءه
ولا فى سياط حاكمه
ولا فى سقطاته ومتاعبه وعذابه اليومى
مشكله الحمار الوحيده
انه مش عارف انه حمار

21 ابريل2007

       تمرغ يا أمير النفط
       فوق وحول لذاتك

       كممسحة
       تمرغ فى ضلالاتك

       لك البترول فاعصره
       على قدمى خليلاتك

       كهوف الليل فى باريس
       قد قتلت مروءاتك

       على اقدام مومسة
       هناك دفنت ثاراتك

       فبعت القدس بعت الله
       بعت رماد امواتك

       كأن حراب أمريكا
       لم تجهض شقيقاتك

       ولم تهدم منازلنا
       ولم تحرق مصاحفنا

       ولا راياتها ارتفعت
       على اشلاء راياتك

نزار قبانى

19 ابريل2007
[shp.jpg]

16 ابريل2007
خمس ساعات من العاشره والنصف ليلا الى الثالثه والنصف فجرا للسفر من القاهره للاسكندرية؟؟!!!!!
وبقطار اسبانى فاخر!!!
الجرار يتعطل ساعه عند طنطا ثم يستبدلونه بجرار تقريبا بتاع موتوسكيل يمشى قليلا ويقف قليلا
ايه الغلب ده؟
صحيح انا كان يومى جميل وحالتى المعنوية عاليه وسعيد وممكن اقعد عشر ساعات من غير ما اتضايق
وصحيح انى قضيت الوقت فى قراءه جريدة الفجر ومعاكسه وتبادل الاحاديث مع السيدة الرقيقه ذات الخمسين ربيعا التى كانت فى المقعد المجاور وتبادل الرسائل القصيرة مع لمى
لكن نفسى اعرف
الحكومه دى خايبه ليه كده؟
بعد كام مصيبه فى القطارات اخذوا مليارات من صفقه المحمول
طيب ايه المشكله بقى
الفلوس معاهم والجرارات عند بتاع الجرارات ولو عايزين قضيان عند عز ولو عايزين فلنكات عند رشاد عثمان
خايبين ليه بقى؟؟؟!!!!

15 ابريل2007
[shp.jpg] رست السفينه على شاطئ الجزيرة
نزلت وانا اتصبب عرقا , الضوء شديد والحرارة مرتفعه والرطوبة 100%
الجزيرة تقع على حط الاستواء تماما فى اقصى شرق الكره الارضية
خطوت بضع خطوات داخل الجزيرة والوضع انقلب
اشجار غزيرة جدا واغصان متشابكه باحكام وحتى الضوء يفشل فى اختراق كل هذه الخضرة والجزيرة كلها كانك فى غرقه موارب الشيش بتاعها
الجو صار رطبا وبه لسعه برد من نسيم صاقع
جبل يخترق منتصف الجزيرة ولا تعرف اين ينتهى فالاشجار تحوطه احاطه كامله
الجبل محفور فيه طبيعيا جندول مياه عذبه شديده العذوبة تنساب من اعلى الجبل بلا توقف ولها خرير يرد على صوت امواج البحر الهادئه التى يصل صوتها من الشاطئ
فراشات ملونه والاف من العصافير والبلابل والطواويس واشكال غريبه من انواع الطيور بالوان طبيعيه لا توصف تغرد وتلهو وتلعب فى سلام
استلقيت على ظهرى ونظرت الى سقف الاشجار الخضراء وقلت لنفسى هل انا فى الجنه؟
بعد قليل قمت اتمشى فوجدت مفاجأه

14 ابريل2007
[SeaNightSky.jpg] عندما تنظر الى السماء ترى شيئا غريبا جدا جدا
ترى منظر متكون من عده ازمنه
القمر من ثانية ونصف
الشمس من ثمان دقائق
اقرب نجم من اربع سنوات
نجوم من 10 سنين ومن 20 سنه ومن 40 سنه ومن الف سنه ومن خمسه الاف سنه وكل ده بالعين المجرده
كل نقطه فى اللى انت شايفه من زمن غير التانى بس الصور وصلت فى نفس اللحظه
ولو واحد قاعد بيبص علينا هناك فى اى حته من دول مش حيشوفنا دلوقتى ابدا
حيشوفنا من 4 سنين او 10 او 20 او الف او 5000 حسب المكان اللى هو فيه
يادى الفضيحه
كل حاجه متسجله

11 ابريل2007
اخدت زومبه النهارده خلتنى افتكر بيت الشعر الخالد مجهول المؤلف
صن سرك عن الناس لا تودعه
من اودع السر فقد ضيعه

الكلام رزق

Tuesday, March 27, 2007

الانتاج قليل

1 comment:

ومضات

Blog Archive

Labels

About Me