Thursday, January 24, 2008

اقتراح للاحزاب


اسوأ ما فى واقعنا ليس الحكومة وليس الرئيس وليس ابن الرئيس
اسوأ ما فى واقعنا هو الاحزاب

وهم الاسوأ لان عندما يكتشف المسافر ان طريقه مسدود يبحث عن طريق بديل
وعندما يفاجأ ان كل الطرق البديلة مسدودة تكون مصيبة

واى شعب
واى تجمع بشرى
لابد ان تجد منه من يميل الى افكار اليسار والاشتراكية والعداله الاجتماعية وتقسيم الثورة والاهتمام بالفقراء
ولابد ايضا ان تجد من يميل الى الرأسمالية وفتح ابواب الابداع وفتح المجال للحافز الفردى وترك الامور لآليات السوق
منطقى طبعا
ومن هذه الافكار واشتقاقاتها تنشأ احزاب اليمين واليسار وما بينهما من وسط وما فى اطرافهم من شيوعية او رأسمالية عنصرية لا ترحم

اذا فالاحزاب تعبر عن افكار انسانية هى موجودة وجوبا وفرضا
فلماذا تترك جمهورها يهجرها ويفقد الثقة فيها وييأس من صلاحها او صلاحيتها

دائما اقرا اخبار الاحزاب واسال نفسى
اهذ سلوك المطالبين بالديموقراطية وكل انظمتهم ديكتاتورية فى اسوأ حالاتها؟
اهذا سلوك منطقى لراغبى اكتساب الشعبية والفوز بثقه الشعب وتوحيد طاقة المجتمع وهم يباتون فى مشاكل ويستيقظون فى معارك؟

اكبر حزبين يمثلون اليمين واليسار
الوفد انقلابات ومعارك قضائيه على الرئاسة والجريدة والسلطة
والتجمع خلافات وتراشق بين السعيد و الحريرى وانصار كل طرف
وباقى الاحزاب فيها مافيها ايضا

وانا لم اقابل اى انسان -على كثرة ما اقابل- يحدثنى عن فكر الوفد ومجهوداته ولا كفاح التجمع وايدلوجياته
كل من حدثنى كان يحدثنى عن الاخوان فقط كأن الساحة خلت لهم
فالمؤيديون يويديون والمعارضون لا يقدمون بديل وهكذا صار الاخوان هم التيار الوحيد فى واقعنا

الاحزاب كلها تشتكى وتبرر عجزها بمضايقات الامن وقوائم الممنوعات ولكنهم جميعا يقرون ان ما يعانيه الاخوان اضعاف ما يعانونه وبالرغم من هذا نجحوا فى التأثير والتواجد

والان اسال او اقترح او احاول ان افهم

لماذا لا تتواجد الاحزاب وسط الشعب؟

لماذا لا يفتحون المقرات لمساعدة الجماهير على حل مشاكلها وتصعيد احتجاجاتها والتوسط لدى الادارات لاكتساب الشعبيه؟

لماذا لا تساعد الطلبة المحتاجين وتطبع الملخصات والملازم ونماذج الامتحانات كما يفعل الاخوان؟

لماذا لا تنظم الندوات الفكريه؟ وحتى لو كان الامن يمنع التنظيم الرسمى خارج الاحزاب فليكن بشكل فردى لمفكرين يؤمنون بفكر الحزب كما يفعل ايضا الاخوان

لماذا لم بنشأ اى حزب قناة تليفزيونية لنشر افكاره والترويج لمعتقداته او على الاقل انتاج برنامج حوارى وشراء وقت اذاعته من اى قناة فضائيه؟

لماذا لم يستهدف اى حزب الشباب يفتش فى مواهبهم ويستغل طاقاتهم ويجتذبهم الى عمل او ابداع فتميل له القلوب ويكتسب بهم الشعبيه؟

كل ما سبق واكثر يفعله الاخوان بمنهجية رائعة
يخاطبون فئات الشعب كل فئة بالاسلوب الذى تفهمه
الاميون والمثقفون, الجاهلون والعلماء, الفقراء والاغنياء
لديهم خطاب ذكى ومختلف ثقافى واجتماعى ودينى لكل نوع وكل فئة
والاحزاب ترى وتسمع وتفهم ورجالها اذكياء وبارعون ولكن سبحان الله
لاحس ولا خبر
كيف يتركون الساحة للاخوان وهم يعلمون ما فى فكرهم المنشور والمعلن من مخاطر تطبيقية ستعود حتما بالبلاد الى عصور ظلام لا يعلم الا الله متى ستنتهى

الغريب ان لو حدث انتخابات بدون تزوير سينجح مرشحى الاحزاب بصفاتهم الشخصية وشعبيتهم الخاصة
وسينجح مرشحى الاخوان بصفتهم اخوان وبسبب شعبية الاخوان
وهذا فرق كبير جدا وهو واضح طبعا فى الدلالة وفى التاثير


على العموم
انا اكتب هذا البوست لاقترح على الاحزاب عملا نافعا

نحن ولاشك فى أواخر عهد سينتهى فى فترة قريبة جدا كما يبدو
سواء بالشيخوخة او سواء بكراهية الشعب بكل فئاته والتى فاقت الحد او سواء بثورة جوعى باتت وشيكة
ولان هذا العهد البغيض جدا والشرير جدا لم يشأ ان يترك مجالا لأذى الناس الا ويسلكه فقد قام بتعديل الدستور ليقضى على الضمانات البسيطه التى كان يكفلها

الدستور الجديد يسمح بمراقبة الناس دون اذن ويسمح بتفتيش المنازل دون اذن ويسمح بمحاكمة المدنيين امام العسكر
وقد لا يتخيل القارئ ما تعنيه هذا التعديلات فى الحياة العملية

مثال واحد فقط
نرغب فى سجن انسان وتلويثه
فى الدستور بعد التعديل
فتش بيته وطلع منه مخدرات واسجنه
قبل التعديل
التفتيش باطل بدون اذن
والحصول على الاذن لابد من اقتناع النيابه بجديه التحريات
هذا ما سيحدث عمليا ولندع كل التبريرات النظرية التى سمعناها فى الاعلام على لسان رجال السلطة


المهم
لو تغير النظام واردنا تغيير الدستور ماذا سنفعل؟
سننتخب لجنه حكماء لوضع دستور ثم يعرض على المفكرين للتحسينات ثم على الشعب مادة مادة لاقراره

مارأيكم ان تبدأ الاحزاب فى هذا من الان؟
تجتمع الاحزاب وتكون لجنة حكماء من فقهاء الدساتير والقوانين ومن جميع الاطراف والتيارات الفكرية

يتم تقسيم الدستور الى اجزاء
عن الحريات وعن الاقتصاد وعن الهوية الخ
تتم صياغة مواد الدستور
سيحدث اختلاف بين الحكماء طبقا لتياراتهم الفكرية سواء يمين او يسار خصوصا مواد الاقتصاد
اذا توضع كل مادة فى اكثر من صياغة طبقا لمختلف الاراء المعتبرة
تتم مناقشة شعبية كبيرة فى وسائل الاعلام وفى اوساط الشعب واوساط المثقفين لكل مادة بكل صيغها لظبط الفكر والصياغة
اتوقع تنفيذ ما سبق فى ستة اشهر تزيد او تنقص حتى نصل الى صياغه مبدئيه لدستور يشمل تكرار لبعض المواد طبقا للمفاهيم المتعارضه

يتم استفتاء الشعب على المواد سواء بقبول الماده او رفضها او سواء فى الاختيار بين الصيغ المختلفة للمادة الواحدة او رفضهم جميعا
يثم هذا الاستفتاء باستخدام بطاقة الرقم القومى تحت اشراف لجان قضائية على مدار شهر او اكثر وباستخدام حاسبات آليه لتسجيل المستفتين بطريقة تمنع التكرار
عموما الاجرءات التنفيذيه تناقش لو تمت الموافقة على الفكرة

سيكون بهذا لدينا دستور جاهز للتطبيق الرسمى عندما يتغير هذا النظام
الفكرة مش مستحيلة ولا صعبة كما تبدو
فقط تحتاج نشاط فى مجتمع كسول


مشكله؟

21 comments:

زُمُرده said...

لولولولولولو
اول تعليق
احمدك يارب
كلامك كله في الجون
تغيب تغيب وترجع بفكر افضل وتركيز اكبر
انا كمان كنت بستغرب ليه كل الاحزاب واقفه تتفرج على الإخوان من غير حتى ما تحاول تقلد وتتبع النهج ثم تنشأنهج واسلوب خاص بها

اما الدستور الجديد فلا حول ولا قوة إلا بالله
وحسبنا الله ونعم الوكيل

فكرتك بخصوص استفتاء الشعب ببطاقة الرقم القومي
فتعليقي بمثل حقيقي واقعي 100% حدث لناس اعرفهم
ذهبوا في اليوم المحدد اللي بيتم فيه تحديد من سيدخل الجيش ومن سيؤجل

والعجب العجاب ان تجد من لديه بطاقة الرقم القومي منذ5 سنوات على الاقل وتجده لديهم مويد على اجهزه الكمبيوتر انه متوفي ...هههه وهو حي يرزق
ومنهم من وجد نفسه رقمه القومي صفر بالرغم من وجوده في بطاقته
وامثله لو ذكرتها لعلمت حقا انك في مصر

ده غير انه لو اطبقت الفكره حتلاقي من يبيع تصويته على مواد الدستور ببضعة جنيهات

الفكرة مش مستحيلة ولا صعبة كما تبدو
فقط تحتاج نشاط فى مجتمع كسول


لا اعتقد اننا شعب كسول ولكننا مجبرين عليه بالواسطه والغش وغياب الضمير والاحباطات اللتي نتنفسها في كل مكان واسباب اخرى محتاجه بوستات لذكرها
-------------------------------
المدونين الاسكندرانية رومانسيون اكتر
وكلامهم خيالى اكتر
واحلامهم عددها اكتر
وامنياتهم مثاليه زيادة

وش بيغمز
الحال من بعضه
-----------------------
كان نفسي اعرف رأيك في بوستاتي اللي فاتت وحضرتك غايب عنا

سوري رغييييييييت كتييييير
بس ده ميزة اللي يجي الاول

ربنا يباركلك في دماغك وفكرك وقلبك

Anonymous said...

إنت بتدن في مالطة
ما تتعبش نفسك
العيب في الحكومة ، صحيح
لكن العيب في الشعب اكتر
ح تقول لي الشعب مسكين وغلبان ومش لاقي ياكل
أقول لك لأ
الشعب بقى مستمريء اللي بيحصل فيه وساكت عليه
يا فرعون مين فرعنك؟
انت عارف الرد
عايزة أقول كلام تاني في قلبي كتير
بس برضه عارفة إني حأعمل زيك
ح أذن في مالطة
وابقى سلم لي على الأحزاب

raspoutine said...

اسوأ ما فى واقعنا الشعب
اللى بيفضل ان يجرى نحو تحقيق المصلحة الشخصية بدل تحقيق المصلحة والمنفعة العامة وده سبب فشل كتير من الاحزاب والحركات السياسية اللى بقت عمرها قصير اوى زى عمر الفراشات



وده طبعاً مع احترامى الشديد لوجهة نظرك وموضوعاتك الشيقة والهامة ودى اول زيارة ليا ومش هتكون الاخيرة لانك مميز فعلاً

تحياتى وبشكرك

ايمن فاروق

Hannoda said...

فعلا سبحان الله

لو تحط المشكلة كلها قدامك

وتقسمها و تبرز كل عناصرها السلبية و الحلول الممكنة و العناصر الإيجابية الموجوده فعلا كأمثلة.. بحيث تتحول المشكلة القائمة كخريطو واضحة جدا زي ما عملت انت دلوقت في التدوينة ده

فعلا لازم تقول سبحان الله
اديني عقل لو عقلي قاصر عن الفهم

ليه ماحدش بيتحرك صح

استنتاج بديهي جدا يا جاري العزيز

عشان محدش فيهم شاغلهم الصح.. و المصلحة العامة

الوفد مش شاغله غير الوفد
و التجمع مش شاغله غير التجمع

وكإن الحزب دولة مستقلة عن الدولة

أما اللي شاغله البلد و الناس هو اللي بيعمل الصح و اللي بيصب في المصلحة العامة.. وإحتمال كبير إخلاصه تجاه مبادئه وتجاه الشعب يوصله لما يقصد.. ورغم اني مش مع سياستهم في تسيير الدولة .. لكن أنا معجبة جدا بوعيهم وبمنهجهم

لا تتوقع من من يشغل منصبا و يواجه الإعلام أن يتبنى فكرة كالتي طرحتها مهما كانت بحق رائعة

هؤلاء يشغلهم ما كسبوه ولا تشغلهم همومنا


وحشني التواصل معاك

klmat said...

حقيقى دايما افكارك مستنيره
وبتقول ملاحظات وجيهه جدا
وبتقدم حلول عمليه
المشكله ان فى الاحزاب من داخلها
النزاعات وقد يكون فيها
من يشغلهم ويعمل دسائس وده
اللى النظام عايزهه
اما الشعب فهو مشغول بقوته
وامراضه وشاف اللى بيقول لأ
بيحصل له ايه ارهاب
ماذا تم مع القضاه تم تعيين
وزير لا يحظى برضاهم او ثقتهم

مش اكتر من ايمن نور بيحاكموا على تزوير توكيلات ولم يحاكموا من يزور اراده شعب العدل غائب والفساد سائد
وبيستقوى ليه دايما سكرتير وزير الثقافه من ارباب السجون القيادات فاسده ومحميه وحتى الاخوان بقوتهم عاجزين

هناك من يعمل على عرقله اى نجاح
لأى حزب او فكر ده الأفراد الصالحين
بيتحاربوا زى عمرو خالد والقرضاوى
حسبى الله ونعم الوكيل
عميق تحياتى

Drop of the Ocean said...

ايه ياباشا انت فييييييين كل ده (حضن الكترونى)

بص ياهارملس ، بجد بجد بجد انت لازم ترشح نفسك للرئاسة

بس متزعلش منى لو بقيت ندلة واديت صوتى لحنفى واولاده (وش خايف)

انا بقول يارب الاحزاب دى متعملش اى حاجة وتفضل نايمة فى العسل لأنها احزاب مضروبة فى مقتل من زمان تتدفن بقى احسن وتريحنا ، وجمعة او الحريرى ولا حتى عاكف مش هيختلفوا ابدا عن حنفى ، وهنخرح من عهد مبارك واولاده لعهد جمعة واولاده ... وساعتها بجد هنتحر

انا بقول يارب تطلع احزاب جديدة متحضرة ومؤمنة بالكلمتين اللى بيكتبوها فى لايحة كل حزب ، احزاب تبقى لها خطة انتخابية غير الميكروفون على العربية النص نقل ، تاخد مكان حقيقى فى الشعب فتتواجد المجلس والحكومة ثم الرئاسة - قول آمين

الهم اللى يضحك ويبكى بردو انك تلاقى الواحد من دول لازق على رئاسة الحزب بالظبط نفس لازقة مبارك على الرئاسة ، ويجيلك وهو شارب كاسين فودكا يقولك نحن نؤمن بتداول السلطة ، نحن نطالب بتداول السلطة ...ياعم طب ماتتزحزح نص متر شمال من ع الكرسى اللى انت متخيط فيه من ساعة ما الحزب اتوجد واعمل تداول سلطة ف حزبك الاول ...

تلاقى الواحد منهم واقف يحب على نفسه فى الديمقراطية ، واين الديمقراطية ، اين الحرية ، ولما يدخل واحد يعترض عليه يقول "طلعوه ابن الـ.... ده بره" ، عمرى ماهنسى لك الموقف ده ياجمعة

احنا والله ماعندنا يسار ولا يمين ولا وسط ، احنا عندنا بس فوق وتحت

على رأى غير معرف ، سلملى ع الاحزاب :(

لازم احزاب جديدة تطلع ، او يحصل تغير كلى فى الاحزاب الموجودة (يعنى كل ماله علاقة بالحزب اكس يترمى وتيجى حاجات جديدة ، حتى مقرات الحزب ،و مايتعملش ريسايكلنج للحاجات اللى اترمت ..احرقوها والنبى )

ايه رأيك تعمل حزب ؟ وانا اول الاعضاء ، ده طبعا يدينى الحق ابقى امينة سر الحزب ، بعدين اتخانق معاك على السلطة ونجيب بلطجية بقى ونضرب نار ويبقى جو اكشن لذيذ كده ,,,

لا بجد والله ، ماتفكر تعمل حزب :):)

كل تحياتى لك ولدماغك العالية ، ومتبقاش تغيب كده

harmless said...

زمردة

كلماتك لها نصيب كبير من اسمك
كلمات لامعه جميله مبهره مثل الاحجار الكريمه
كلمات تتزين بها الصفحات وتعجب عيون القراء وتثير عقول المتأملين

اشكرك يا عزيزتى على تواجدك
وانا اتابع طبعا كل ما تكتبيه
ربما احيانا لا اجد تعليقا يلائم جمال كلماتك ولكنى قارئ دائم لكى

بوست كلمات مثلا كان رائعا وصادقا وياليت كل انسان منا فهم قيمة الكلمات التى تخرج منه وكيف هى اسلوب التواصل الوحيد بين البشر وهى التى ستحدد مكانة كل منا بين الناس

والبوستان من زمرده لزمرده على لسان زمرده ومن حبيب زمرده لزمرده على لسان زمرده فهما رائعان وتركيبه لغوية وانسانيه جديده ويستحقان مناقشه اطول

تحياتى واعجابى الدائم بكى يا صديقتى العزيزة

harmless said...

Anonymous

والله يا صديقى انى ارى الشعب بريئا تماما مما هو فيه
والبراءه لا تعنى التبرؤ من الصفات السيئه التى استفشت فينا ولكن الموضوع يحتاج نظرة اشمل

ان ما آل اليه الشعب من سوء فى الاخلاق وفساد فى الذمم واختلال فى الموازين نتيجه طبيعيه جدا لنظام حكم اللصوص وما كان اى شعب ان يسلك اى سلوك غير هذا ولو عف الملوك لعفت الرعية

ولكى تتضح الصورة يا صديقى اسألك
هل يمكن لصاحب شركة ان يترك خزائنه مفتوحه بدون رقابه وبدون نظام عقاب للسارقين وان يكون هو ايضا من اكبر اللصوص ثم تتخيل ان العاملين فى الشركة لن يسرقوا هذا المال؟

harmless said...

raspoutine

هل يمكن النظر الى سلوك شعب كامل والاكتفاء بلوم السلوك دون النظر لاسبابه وتحليل نبريراته وفهم دوافعه؟

النظره والتحليل فى مجال سلوك شخص واحد مختلفه عن النظرة والتحليل لسلوك شعب كامل
لا اعتقد ان هناك شعب تعداده ملايين فاسد بالفطره ومنحل بالخلقه وتجمع تاريخى للحراميه ورجال العصابات

ان سلوك عدد كبير من البشر مرتبط بالمسارات التى خلقها النظام الاجتماعى للافراد لكى يسيروا فيها

اذا كانت تلك المسارات تسمح للموهوبين والاذكياء والشرفاء والحكماء للارتقاء وقيادة المجتمع يصلح العامه ويتنافسوا فى الترقى والسمو

واذا كانت المسارات تسمح للمنافقين والقوادين واللصوص والخائنين واشباه الرجال للترقى والسياده انهار المجتمع وتنافس العامه فى الانحطاط والتهليب
ووقتها ويل للشرفاء
لامكان لهم الا السجون والمعتقلات

لا يفوتنى طبعا ان ارحب بك صديقا عزيزا افخر بتواجده واتمنى دوام صداقته
تحياتى

harmless said...

هانوده

الاخت العزيزة وراء البحار
افتقدتك كثيرا وافتقدت صولاتك وجولاتك وتأملاتك وعلاقاتك الجميله بالوجود كله

يبدو فعلا ان الاحزاب رضيت بدورها الحالى كديكور هش لتمثيليه سخيفه مقابل بعض التواجد والمزايا لافراد معدودين فى القمه

واذا تخلفت قيادات تيار فكرى ما عن دورها فلا يمنع هذا من وجود التيار ذاته ولا يمنع هذا ان يأتى الوقت الذى يبحث فيه هذا التيار عن كيان يعبر عنه بصدق وينتهى حال هذه التمثيليات الى الفناء

عندما يكون التدمير شامل
نحتاج الى عمل كثير

harmless said...

klmat

محاربة الفاسد للشريف والطالح للصالح منطقيه جدا
لا يمكن تخيل الا هذا خصوصا لو كان الثمن سلطه لا حدود لها ونفوذ لا آخر له ومال لم يتيسر لملك ولا فرعون

ولكن هذه الحرب لا تعنى هزيمة الخير بالضرورة ولا تبرر تخاذل الشرفاء او تسليمهم

ربما تكون الحروب التى تعرض لها القرضاوى وعمرو خالد وغيرهم هى اهم اسباب قوتهم والتفاف العامه حولهم
ولو تخيلنا العكس لحامت حولهم الشبهات وفقدوا ثقة الناس

لكل شئ ثمن يا عزيزتى والعمر صغير على اى حال لا بأس لو ضاع فى سبيل الحق والعجب كل العجب لمن بلغ آواخر ايامه ولا يزال يظلم ويسجن ويذل

تحياتى

harmless said...

Drop from the Ocean

بعد الترحيب والحضن الالكترونى يذهب صوتك الى حنفى؟؟؟!!!!!!!‏
اكيد الصوت الكترونى برضو

بصراحه بصراحه انا فاقد الثقه فى جيلى تماما
ولولا بعض الشرفاء والموهوبين امثال ابراهيم عيسى ووائل الابراشى وعمرو اديب ومجدى مهنا والجلاد والمسلمانى وغيرهم لربما توهمت اننا اسوأ جيل فى تاريخ البشرية

دائما ما قلت لاصدقائى ان الاء صاحبة موضوع التعبير الشهير هى ووالدها مثال صارخ جدا لجيلكم وجيلنا
هى كتبت بحرية وتحدت الوزير والرئيس
ووالدها جرى يبوس الايدى ويستعطف القادة المرتعشين ويرضى بسقوط ابنته فى المادة
ولا تنسى ان من نفس جيل ابوها كان المصحح والمدرس ومدير المدرسه والمفتش الخ

اقصد ان اقول ان الامل منعقد على حضرتك انتى وجيلك لتنهضوا بانفسكم وبنا

وربما تتعجبى لو علمتى انى اتمنى من كل قلبى ان تحكم مصر الصفوة من جيلكم من اصحاب اعمار العشرينات
ومتأكد ان اخطاءكم من قلة الخبره ستكون اقل بكثير جدا من اخطاء جيلنا الفاسد حتى النخاع
والفساد الذى اعنيه ليس ماليا ولكن فكريا

معظم جيلنا فسد فكريا ولا يصلح للقيادة ابدا

يعنى من الاخر
حضرتك حتبقى رئيسة الحزب

Hannoda said...

وطالما اشتقت لكل ده أمال مخاصم مدونتي ليه؟؟

بقالي كاااام يوم بقول لنفسي المدونات مش مكان ينفع أتقمص فيه.. بس مش قادرة ما أقولكش اني مقموصة منك
شوية

بس غيابك عن مدونتك شخصيا صالحني
:)

مش عاوزة أعتذر عن العتاب
ممكن؟

klmat said...

انا متفقه معاك فى ان الفاسد
بيحارب الصالح ومعاك فى الكفاح وعدم الاستسلام ومقاومه الفاسد واجب انا متفقه
معاك تماما انا بس كنت عايزه اعبر عن
مدى رغبه النظام فى بقاء الوضع لما هو
عليه لخوفه من التغيير بس ان شاء الله
التغيير قادم دوام الحال من المحال
تحياتى وتقديرى

klmat said...

انا متفقه معاك فى ان الفاسد
بيحارب الصالح ومعاك فى الكفاح وعدم الاستسلام ومقاومه الفاسد واجب انا متفقه
معاك تماما انا بس كنت عايزه اعبر عن
مدى رغبه النظام فى بقاء الوضع لما هو
عليه لخوفه من التغيير بس ان شاء الله
التغيير قادم دوام الحال من المحال
تحياتى وتقديرى

Doba said...

كما قلت سابقا كلماتك اكبر من ان يعلق عليها شخص مثلى لانى أشعر ببلاهتى وسط كلماتك وارجع هذا ربما لقلة الخبرة او عدم الاهتمام بالسياسة او الاحزاب ولكن كلامك لانه رزق بيعجبنى قوى

عارف

انا بيعجبنى تعليقاتك قوى
اكتر من مرة بعتها لناس اصحابى والكل بيعجب بيها بشكل لا تتخيله
لدرجة انى جمعت بعض تعليقات من البوست اللى فات وبعتها لاصحابى المقربين عالنت والكل أكد صواب اختيارى واشاد بكاتبها وعقله المستنير

عجبنى جدا تعليقك عند كلمات على الرغم من بساطته وكذلك تعليقاتك هنا ردا على الاخوة المدونون

تقبل اعجابى وتحياتى وسلامى
وامنياتى بكل التوفيق دائما وابدا
هبة

harmless said...

هانودة

اتظنى فعلا انى ممكن اخاصم مدونتك؟
طبعا اقرأها بانتظام واطل عليها يوميا
احيانا احتار فى اختيار تعليق ولا تسعفنى القريحة ولا اجد ردا يليق بكلامك وبمدونتك وبشخصك الجميل فاقول لنفسى غدا يأتينى رزقا ملائما

احيانا اشعر كأن العديد من المصابيح المنيره فى عقلى تنطفئ واحدا تلو الاخر
والموضوع زاد بصراحة اليومين دول

harmless said...

هبة

معقول هذا الكلام؟
والله يا عزيزتى وبدون اى تواضع اجوف انا اقل من هذا بكثير
انها الحقيقه التى اذكر نفسى بها دائما

لولا ستر الله على عباده وقدرة الانسان على اخفاء عيوبه وتجميل مثالبه لتضاءلت الشخصية وضاعت المكانه وذهب التقدير
و ما كنت اجرؤ ان اطل على الناس فى الحياة او فى النت

ولكنى سعيد جدا بكلماتك الرقيقه خصوصا انها كلمات من انسانه رائعه فى مكانه عاليه يجمع الجميع على محبتها واحترامها وتقديرها

تقبلى اعجابى الدائم يا عزيزتى

Hannoda said...

ساعات أما الرزق يجف قوي يكون انذار بخير وفير جي ي الطريق.. وهي قلوبنا و أمزجتنا كده.. لازم نطاطيلها عشان تعدي الصعب بسرعة و من غير عناد

بجد شكرا على كلامك اللي بيفرحني بصداقة قريبة و عزيزة علىّ جدا

مبروك الفوز
:)

Anonymous said...

عارفة انى اتاخرت ولم الحق المجموع لكن على اى حال كنت عايزة اضيف مقترح واحد بس - هو اننا نسقط كل الاحزاب الحالية وندور على اشخاص همها فعلا البلد والغلابة لا اخوان ولا حكومة ولا معارضة ولا موافقة لان كل دول مش ممكن يسلموا بالامر وينفذوا مقترحاتك وكل همهم ازاى يوصلوا للسلطة ، خلافاتهم شخصية وتعاقدتهم واتفاقتهم مصلحجية حتى حزبهم لخدمة اغراضهم ، يجيبوا منين التسليم لمصالحنا - والاشخاص اللى هانختارهم تقريبا هايكون واحد كل 1000 نفر ف المربع الواحد صعبان عليه البلد وصعبان عليه الغلابة ونلخص المجموع ف حزبين حزب همه البلد ويكون ده اسمه وحزب همه الغلابة ويكون ده اسمه ، وليه اخترت الحزبين ؟ اقولك علشان ساعات بنضحى بغلابة كتييييييييير لاجل البلد ولازم نلاقى حد يحاول ينقذ حقهم - وحزب البلد علشان ما نبقاش دايما بلدنا مطاطية قدام قهر العملة و حبس اللا

harmless said...

الغالية زوجة المحظوظ

عندى احساس انه على قلة اخبارك لكن عندك احداث كتير
يارب يكون خير فى خير

افتقدتك فعلا وسعدت جدا عندما وجدت اسمك اضاء ركن التعليقات

اشكرك