نصر المهروسه

فيه بلد فى اخر الارض , بره خطوط الطول والعرض , بلد جميله اسمها نصر , اهلها مسمينها المهروسه , يعنى نصر المهروسه , كل يوم يغنولها الف غنوه , وانتى فى القلب وفى الكلوة , ويا جميله ويا حلوة , وكلام كتير يا ابو علوة , اهل البلد دى لو حكمهم ملاك حيشيطنوه , ولو ملكهم عبد حيألهوه , طبعهم كده من زمان , وشكله حيفضل لاخر الزمان


المهم ربنا بيحب المهروسه , واداها انواع من الخير مرصوصه , لو بصيت شويه وحسبتها , حتلاقى مافيش بلد زيها , ولا ينفع يبقى فيه حد اغنى منها , بس نعمل ايه فى اهلها , وحكام اهلها , يموتوا فى المعونات والشحاته , ويستحملوا عشانها الذل والغتاته


نصر طول عمرها بيحكمها الحراميه , لكن حراميه مستحيه , وراضيه ومرضيه , بشويه نقديه , لكن الزمن اتغير , والحراميه افعالهم تحير , بطلوا يشبعوا , وكبروا واتوسعوا , كنزوا مليارات , فوق الوهم والخيالات , فلوس ما حدش يعرف يصرفها , لكن برضو الندل بيزودها , لحد ما اتفقر الملايين , وسكنوا المقابر واكلوا الطين , وبرضو ساكتين , والتانيين , مش ساكتين , ومش شبعانين , باعوا كل حاجه , وسرقوا كل حاجه , ولما مافضلش حاجه , باعوا الناس , بعد ما نسوا انهم ناس


جالنا اخبار من نصر المهروسه , الناس باينها ملبوسه , او الدنيا بقت معكوسه , اصوات من كل حته هدير , ونار وشرار من كل زقاق بيطير , سيل من البشر كبير , وغضب فى السما بيطير , والفراعنه المتفرعنين بقوا فيران , كان نفسى اشوفهم كده من زمان , شوف الوحوش بقوا مساكين , مرعوشين خايفين , وعيونهم مرعوبين


وكبير الكبرا فى القصر , مش مصدق ان ده يحصل فى نصر , البلد الوديعه المهروسه , اللى عايشه بالكرباج والكوسه , بيقول لنفسه ده انا الملك , اللى يعاندنى يبقى هلك , انا اللى بقالى عمر مديد , اضرب واحكم بحديد , ده انا الاله وهم عبيد


لكن الاخبار ما بتهزرش , والشعب قام ما حيرجعش , آه لو تشوفوا نظرات الرعب فى عيون الفرعون , ومراته وشها جاب الف لون , وابنه بيحاول يتصل بموبايل او ارضى , نفسه يوصل لحبيب النادلى , قالوله اختفى ويمكن سافر , وكمان نحيف اصلا هاجر , والشله كلها اتدبحت , وقصورها راحت واتحرقت , حتى بارينا اتدكت , والابن التانى بيعيط منهار , بيقول لابوه انت السبب , انت الكبير واحنا صغار , ايه اللى خلانى يا رب اتهبب , واجى اعمل زعيم مغوار , الكبير صرخ فيهم , بينا بينا على المطار , نهرب قبل الدمار , ياروح ما بعدك روح , اجلوا البكا والنوح

لكن يا ناس , الظلم مالوش اساس , والظالم بيدوق الكاس , مالحقش الظالمين يهربوا , النصاروه خلاص قربوا

شوف يا زمن بصى يا عين
الفراعنه مشنوقين م الرجلين

هانت الدنيا

متى تهون الدنيا فى عيونكم يا أهل الدنيا؟

تعذب طفلا عنده 12 سنه حتى الموت ليعترف بسرقه باكو شاى
متى تهون الدنيا فى عينك؟

تعذب رجلا بريئا حتى يدخل فى سكرات الموت فتلقيه تحت مكتبك عند قدميك وتضربه بحذائك فى وجهه امام اهله فيموت وتقول اصله بيمثل
متى تهون الدنيا فى عينك؟

تشتبه فى شاب فيأتيك بنفسه ليبرئ ساحته فتعذبه وتعلقه وتضربه ثم تلقى الكحول على جسده وتشعل فيه النيران ليحترق امام عينيك
متى تهون الدنيا فى عينك؟

تلقى شابا من النافذه امام اطفاله الصغار وزوجته واهله وجيرانه لخلاف على ملاليم
متى تهون الدنيا فى عينك؟

شاب من البشر معدود على الانسانيه له كرامته وخلقته التى سواها الله تكتفه وتضربه وتعريه وتدخل عصا فى دبره وتصوره فيلما توزعه على زملائه لتحطمه وتشوه نفسه
متى تهون الدنيا فى عينك؟

وزير وعظيم واستاذ تذهب لزيارة مدارسك فى الصعيد فتجد منافقيك يرصون اطفالك تحت الشمس الحارقه لاستقبالك فتموت تلميذتك وابنتك الملاك الصغير
متى تهون الدنيا فى عينك؟

لواء ومساعد وزير لا تحتاج ولا تعانى فى دنيتك وترى وتشاهد وتعلم كل مصيبه اعلنت او لم تعلن فتتصل بالفضائيات تكذب بوجه مكشوف وصوت وقح وتخلط الحق بالباطل وانت عالم ان كل من يسمعك يحتقرك ويلعنك
متى تهون الدنيا فى عينك؟

نصف عمرك تحكم وتتحكم وتتعالى وتتكبر وتسجن وتعتقل وتكذب وتناور وترفع لصوص وتخفض اشراف وتعز احقر ناس وتذل اشرف ناس حتى عم الفساد وجاعت الرعيه ووصلت الى الثمانين من عمرك وتعلم اكيد ان وقت الرحيل قرب
متى تهون الدنيا فى عينك؟

عم ابراهيم

عم ابراهيم الفراش زميلنا فى العمل
انسان كالملاك
اذا نظرت الى وجهه تشعر انك تنظر الى احد اهل الجنه
نفسيه صافيه جدا
قلب طيب جدا
ادب غير معقول
سعة صدر وقوة تحمل اسطورية

بقاله كام يوم حزين
عينه تنطق بحزن صامت قاتل
ابتسامته انطفأت وذبلت
خطواته تثاقلت
مرحه صار ذكرى
مداعباته الخجلى تلاشت
دعواته لكل فرد منا صارت تمتمه حزينة

وفى صمت وبالتدريج
توترنا جميعا
واضطربنا كلنا
وزحفت الكآبه علينا
وتسلل الحزن الغامض لقلوبنا

حاول كل فرد منا على حدى معرفه اسباب حزن عم ابراهيم
وكل المحاولات فشلت
عم ابراهيم صامت
لا اجابه لديه سوى الحمد لله

آه يا عم ابراهيم
كم انت غالى
كم حزنك مؤثر ومتعب

وفجأه انكشف السر
باح عم ابراهيم بالسر لاحدى الزميلات فنقلته لنا فى ثوانى

عجبا
كلنا لم يعد لنا موضوع سوى مشكله عم ابراهيم
لا عمل ولا مواعيد ولا التزامات ولا تعاقدات ولا واجبات ولا اى شئ
فقط عم ابراهيم

ابنة عم ابراهيم ستتزوج
والزيجه مهدده بسبب الفين من الجنيهات
اسودت الدنيا فى وجه عم ابراهيم وفشل فى التصرف
رأى من قسوة الحياة ما لم تراه روحه الراضيه فى عمره كله
انكسرت نفس عم ابراهيم وركبه الهم وشعور العجز بسبب هذه الجنيهات اللعينه

لم ينتهى اليوم الا وكان ضعف المبلغ فى جيب عم ابراهيم
وعادت البسمه لوجهه الملائكى
وعادت مداعباته ودعواته
وعاد كل منا الى عمله راضيا مطمئنا

وبالامس كنا كلنا فى فرح ابنة عم ابراهيم
فى الشارع فى منطقه شعبيه
مئات من محبى عم ابراهيم يقبلونه ويهنئونه ويحيطون به
وهو يحتفى بنا نحن زملائه فى العمل

يظن انه يتشرف بنا
والحقيقه
اننا الذين نتشرف به