Saturday, May 19, 2007

الخرافات


بصراحه
انا من جيل اعتنق الخرافات طول حياته
امن بها ودرسها فى مدارسه وهتف بها وسار فى دربها وهى مجرد خرافات فى خرافات
انا من جيل تربى على الكفايه والعدل والاصلاح الزراعى وقانون المساكن والقطاع العام والابره والصاروخ واقوى قوة ضاربه فى الشرق وغيرها وغيرها
وعندما كبرنا اكتشفنا انها خرافات فى خرافات

انا من جيل هتف لقاتليه واحب جلاديه وعظَم معذبيه ووقر مجرميه وطبع القبلات على ايدى سفاحيه

فهل تظنون ان جيلى قادر ان يربى جيلا صالحا فاهما واعيا مدركا لما يملك من حضاره اختفت وراء الاتربه وثقافه تحتاج لها البشريه شرقا وغربا

هكذا ظهر جيل اولادنا مظلوما فاقدا للقدوه مشتتا متوترا لا يجد سوى اب محطم مهزوم معزول مقهور لا يقدر على تربيه ولا يعطى مثلا ولا يفهم الا فى الخوف والرعب والمشى جنب الحيط

لا تظنوا انى مبالغا
انظروا الى الاء كاتبه موضوع التعبير
ماذا فعل اباها؟
هل وقف بجانبها وبث فيها روح الشجاعه والحريه واحترم رايها وناضل معها؟
لا
قبل الايادى واعتذر وقبل ان تسقط واعتبر الملحق افضل من اعاده العام وقدم الشكر والاعتذارات
اما مافعله معها فى المنزل فاتركه لخيالكم

وماذا فعل ابو امبرة التى ماتت من ضربة الشمس وهى فى تشريفه الوزير
كتب اقرارا انها ماتت قضاء وقدر وقال للصحف انهم هددوه ولا يقدر على المشاكل

وفى موضوع الاء من اصلا الذى احالها الى التحقيق وصعَد الموضوع من يد مرعوبه الى يد مرتعشه الى يد جبانه؟
انه جيلنا جيل الاباء
وفى موضوع اميره من الذى ساق الاطفال فى الشمس الحارقه للتشريفه
انهم النظار والمدرسون والمشرفون
اذلاء حقراء يتمنون مجرد نظره رضا من الوزير او بضع جنيهات بلقيها لهم
انهم جيلى الذى لا تخطئه العين

والان انظر حولى فاحزن على جيل الابناء
اجتمع عليه كلاب الارض شرقا وغريا يريدون ان يهزموه ويحولوه عن ثقافته ودينه ويزينون له عالما حقيرا دنيئا على انه عالم حر متحضر ويصورون له العفه تخلف والشرف غباء والدين افيون
وهذا الجيل المظلوم يحتاج الى مثل اعلى فلا يجد الا اللصوص والمنافقين والداعرين واشباه الرجال يحكمون ويقهرون ويظلمون ويقطعون راس اى حر شريف

والنتيجه كما نرى
اعتنق جيل ابنائى كما اعتنق جيلى جبال من الخرافات
خرافات من نوع جديد
خرافات صارت كانها الشمس فى وضوحها وهى مجرد خرافات
خرافات من كل نوع ومن كل شكل وكلها هدفها واحد
القضاء على الهويه والثقافه والدين
خرافات تدعو لليأس وخرافات ترسم لك وهما من السعاده والمتع وخرفات تجعلك مرعوبا خائفا

وبعد ما انقضى من عمرى اغلبه
وبعد ما عشت سنين طوال وذهبت يمينا وشمالا وقرات هنا وهناك لا اجد امامى الا كتابه هذه الكلمات
مختصره جدا فالتفاصيل لا نهايه لها
يائسه جدا فالخرافات تمكنت من العقول

اصدقائى
انتقيت لكم ثلاث من اكبر الخرافات التى نحيا بها ليل نهار
احدهما للترغيب
والثانيه للترهيب
والثالثه للتيأيس
هكذا صنعها صانعيها وهكذا صدقها معتنقيها

اعلم مسبقا انكم لن تصدقونى ان كل هذا ما هو الا خرافات
ولكن على الاقل هو رايى
ولا املك الا رايى


اقرأوا الثلاث بوستات التاليه
واجعلوا التعليقات مجمعه هنا

31 comments:

gohayna said...

مساء الخير يا هرملس


بما ان الموضوع طويل ودسم للغايه فحرام اظلمه بتعليق واحد اسمحلي هعلق تلات مرات علشان كل موضوع ياخد حقه

بالنسبه لاول بوست

فأنا معاك في كل كلمه

ودا من واقع تجربه شخصيه
والدوله الي بتكلم عليها هيا امريكا

علي سبيل المثال لاالحصر

دايما بشوف في عيون الناس اول ما يجي الاسم انبهار غريب
وتصور لحياه مختلفه تحترم حقوق الانسان وكرامته

اطار مزيف يزين صوره قبيحه لواقع بغيض ليس الا
الحياه هناك مختلفه الي ابعد حد عن كل معلوماتنا
هما بيحاولوا يوصلوا صوره معينه لدولنا عنهم لكن صدق من قال

فاقد الشيء لايعطيه

تتشدق امريكا باحترام القوانين واقلمه اسس العدل

بينما هيا غارقه حتي اذنيها في ازداوجه المعايير
واهدار حقوق الانسان في الدول الاخري

انت ذكرت امثله من التاريخ

والتاريخ بيعيد نفسه حاليا بصوره متقدمه في العراق

يمكن زمان كانت الدول المحتله تقتل مليون او اتنين من غير ما يكون فيه رادع او حساب

دلوقتي انتهجت نظام جديد
في العراق سياسه فرق تسد او الفوضي الخلاقه
واطروحات شرق اوسط جديد برؤيه امريكيه وتدبير اسرائيلي

برضه بتصفي الشعب لكن باسلوب مختلف

تجعل الشيعه يبيدون السنه ومن ثم تبيد هيا ايران وكل ما ينتمي لها
اهداف بيعيده المدي تعكس مدي وحشيه وهمجيه صانعي السياسه مدي التقدم والحضاره

ناهيك عن ما يحدث في سجن ابو غريب

ومعتقلات جوانتنامو بعيد عن اعين الصليب الحمر ورقابه المظمات الدوليه المعنيه بحقوق الانسان والاسري

سقطات تكشف بين الحين والاخر عن الوجه القبيح وتزيل قناع السماحه والعفه عن وجوه ونفوس مريضه

بجد تسلم رؤيتك يا هرملس

دا كدا اول تعليق عي اول بوست

هكتب التاني اوع تقوم

gohayna said...

مساء الورد بقي المره دي

وبرضه انا موافقاك ومعاك قلبا وقالبا
ياريس والله

مكنتش تبقي انت الريس وتريحنا من الذل وامتهان الكرامه وتعيد لنا الشعور بادميتنا مره اخري؟

وتمحو وصمه العار التي اصبحت تلاحقنا باننا عرب
مهزومون دائما جبناء علي طول الخط


عارف لما يكون فيه نظريه
بتقول

لكل فعل رد فعل مساوي ليه في المقدار ومضاد له في الاتجاه
؟
اكيد عرفها

تفتكر احنا بنطبق اي جزء في النظريه دي

تقريبا ولا حاجه
رد الفعل الوحيد هوا تلات حجات

نشجب
نستنكر
ونجتمع في شرم الشيخ
والزي الرسمي للرجال الشورت الشرعي
اما النساء فالمايو افضل علشان البرونزاج
وامتاع الاخوه الافاضل رؤساء الدول


عرف فيه قصه قريتها هختصرهالك بس توضح كل الي انت قولته

كان فيه مره رجل وعنده حقل كبير جدا ومليان بخيرات ربنا
صحي من النوم في يوم علي صوت نهيق حمار عمال ياكل في الزرع
خرج يجري علشان يمشيه
في اول يوم جه جنب الحمار وقله لوسمحت اطلع بره

مفيش فايده والحال مستمر

تاني يوم قله بصوت اعلي شويه مائل للصراخ اطلع بره بقي
مفيش حاجه اتغيرت
كل الي حصل ان الحمار اخد باله من الراجل وصوته وتسأل هو ماله دا؟

تالت يوم اتفق الراجل وجمع ناس اصحابه وكتبوا شعارات وعلقوا يفط في كل المزرعه تطال الحمار بالانصراف وترك الارض والا

وطبعا الحمار استعجب من الي عملينه وتقريبا قال والله الناس دي بتحتفل بيا وعمال تهيص علشان موجود


في الوقت دا عدي ولد صغير شاف الي بيحصل وعرف الموقف
مسك طوبه ورماها علي الحمار
وطبعا الحمار ترك ساقيه للريح وساب المزرعه

عارف بقي المشكله فين؟

انه مفيش ولد زي دا؟
مفيش فكر زي دا؟
مفيش حتي الطوبه دي؟

مضخمين صوره لشيء اشبه بالطفيليات علي انها فيروس قاتل ورهيب وهو في الحقيقه اضعف من ما نتخيل

اوع تكون زهقت مني

انا لسه ورايا بوست تالت هعلق عليه

استني

Nada said...
This comment has been removed by the author.
gohayna said...

مساء اسعد من الي قبله

الموضوع التالت دا بقي فجيه علي الجرح

قتبله يعني

صحيح اننا ميلزمناش كتير ابدا علشان نعدي الفجوه

وصدقني احنا عندنا عقول افضل مليون مره من الي عندهم

ولغايه دلوقتي بيعرضوا علي العقول النابغه انها تستمر معاهم هناك

المشكله زي ما انت قولت في النظام

النظام الي مسيطر علي عقولنا وفالح بس يستورد كل ما هو بغيض وقيح بدعوي التقدم وطمس الابداع والفكر العقلي

كان فيه مشكله قبل ما اسيب
مصر في كليه الصيدله
22
من الاوائل في الكليه بعد ما عينوهم استغنوا عن 8
منهم

واحد منهم حلف انه لو جتله فرصه بره
عمره ما هيرجع هنا تاني

ومليون الف مثال ومثال
محمد صاحب كتاب لشرح علوم الفزياء بطريقه مبسطه دخل بكتابه موسوعه جنيس
ومعرفش يدخل كليه علوم في مصر بسبب الاقوانين واللوائح العقيمه


محتجين كتير يا هرملس علشان نغير الي بيحكمونا
نكسر طوق الجهل والتخلف الي ربطنا بيه

تسلم ايدك علي كل البوستات دي
مجهود كبير ومعلومات غزيره اللهم لاحسد ابدا

تحياتي ليك علي الدوام يا هرملس

Hannoda said...

تعليقي ده يخص الترغيب

طول عمري من جواي رافضة الترغيب في ثقافة الغرب..

آه علم الغرب مثال يحتذي .. وهو مش خرافة.. إنما نموذج لازم ناخد منه قواعد

وأعتقد إن حتى بداياته إحنا ساهمنا فيها بعلماء العالم إتعلّموا منهم العالم

أما معتقدات.. التعاملات.. السياسات.. وحتّى التربية

أراها كما قلت بالحرف
مسخ


أنا أعيش تجربة مضحكة بالفعل مع أحد أقربائي

أحد بنات خاللاتي متزوجه دنماركيا
وأبناءها دانماركيون

تأتي بهم كل سنه ليقضوا شهرين مع العائلة في مصر.. ليتعرفوا على أهلهم و لكي لا ينسوا لغتهم

ويأتي معهم الزوج الدانيماركي

ومن لحظة وصول الأسرة إلى المطار و يبدأ التوتر في الجو العائلي

أصل دول أجانب

مواعيد للزيارات .. أصل دول أجانب.

تحذير شديد اللهجة في التعامل مع الأطفال الصغار.. أصل دول أجانب

غربة شديده عن إبنه خالتنا وتعاني هي منه و نعاني منه ومبرر والديها هو.. أصل دول أجانب

لا أفهم ما علاقة التحضر بالجمود وصلابة المشاعر وإنعدام الدفئ وتقييد المشاعر

ما علاقة التحضر باللغة.. فاللغة علم و ليس طريقة حياه

طريقتي في الحياه هي لغتي أنا وفقط
أما العلوم التي تعلمتها و قد أفتخر بها هي تخصص كذا وكذا و منهم اللغة.. بس كده.. وبكل بساطة

التحضر في قرآننا مكتوب.. وماعرفش ليه متجاهلينه و بندور عليه فناس أبعد ما يكون عن طبيعتنا و مشاعرنا

بكل بساطة و ضئالة في ثقافتي الشخصية و تجاربي بالنسبة لك رديت عليك

وبكل دول بلاقي نفسي من زماااان.. مندهشة و متأكده إن الناس ده فاهمة غلط.. فاهمين التحضر غلط

Van Gogh said...

اولاً
حمدلله على السلامة

ثانياً

انا متفق معاك بنسبة مية فى المية فى كل اللى قلته
من اول هزيمة الجيل الناصرى
لحد الراية المكسورة اللى حتى مشفنهاش

ومعاك فى ان العالم المتحضر
مش متحضر بالصورة اللى احنا فهمنها
وان الفرق بينا مش كبير

بس تفتكر ايه المطلوب عشان نتغير..ونرجع السباق مرة تانية..؟؟

ثورة علمية..معملية فذة
بس فى مشكلة
الثورة العلمية او الأجتماعية
مينفعش الشعب لوحده يقوم بيها
ولا الحكومة لوحدها
دا اتفاق ضمنى على التقدم
زى الصين..وماليزيا
و امثلة كتير

طب الحكومة مش طلبة معاها تقدم وكلام فاضى من ده
كلام من اللى ممكن ياكل فلوس البلد
ويبعدها عن جيبوهم..وجيوب كلاب الأعمال الى ملمومين على البلد
يبقى ايه الحل..؟؟
نسكت لحد ما يجى ابن جمال ويزهد فى الكرسى مثلاً..؟؟
اكيد لا
طب نعمل ثورة سلمية
اكيد هما هدونا بالجزمة ويقتلونا ويعتقلونا
بس ارجع
زمان قالوا
الثورة
يخطط لها العقلاء
وينفذها الشجعان
ويكسب من ورائها الخبثاء

اوعى تظلم جيلكم
اه انتوا كنتوا ماشيين جنب الحيط
بس حيط زمان غير حيط دلوقتى

مصر عبد الناصر والسادات
بكل ما لهم..وكل ما عليهم
كانت مختلفة كتير عن مصر مبارك
مصر مبارك اللى اكبر انجازتها المترو
ونفق الأزهر

انتوا...والجيل اللى قبلكم
واحنا من بعدكم
كتير منا شايفين نفسهم عقلاء
واكتر عايشين وسط الناس خبثاء
والشجعان
لم يصلوا بعد للقدرة على احداث اى تغيير

وكأن مصر طول عمرها
رصيدها من الشجعان
لا يكفى

Hannoda said...

تعليقي الآن عن الترهيب

أعتقد إن الخرافة المرة دي ما جاتش معاهم صح

لإني معتقدش إن في كم كبير من العرب خايف من إسرائيل

أو بمعني أدق
ما اعتقدش إن فيه كم كبير من شعوب الدول اللي عندها جيوش مؤمنة بقوة إسرائيل

ما افتكرش إن اللي راعبنا منها هو جيشها أو قوتها

اللي مناعنا منها هي القوة اللي معاها على طول الخط

تفتكر أمريكا حاتقف تتفرج على العرب وهم بيحاربوا اسرائيل

وتفتكر لو ما وقفتش تتفرج و إتدخلت.. حانشوف على الخريطة كام عراق في الشرق الأوسط؟؟

عندي رغبة شديده جدا لأن أستفيد منك

منتظرة الإفادة

وبعيدا عن كل هذا

حقا .. أشتقت إليك

loumi said...

ياااااااااااااااااه
هو انت كل مرة لازم تقلب عليا المواجع كده؟
بما انى من جيلك
و اولادى من جيل اولادك
فالهم واحد
و بصراحه تعليقات هنوده وجى جى وفا ن جوخ ودول جيل اولادنا اسعدنى
والامل فيهم بس يمكن التغيير يكون على زمن اولادهم

اما الترغيب والترهيب والتيئيس
فحكامنا واخدين دورات تدريبيه فيها على ايدى القوى الكبرى
وهنك زيارات دوريه لهم لاطلاعهم على
اخر ما توصلوا اليه من هذه الاساليب
اذا كان الحاكم لا يجدمن يحاسبه على ما يقوم به فى حق شعبه من اذلال و قهر
فهو الملك المتوج بدون تاج
و هو الحاكم بامر الله
و هو اداه فى يد قوى خارجيه تنفذ سياسات عنصريه على مر التاريخ
هم يسعون لاضعافنا وتخلفنا وشغلنا بامور جانبيه كثيره لكى لا تقوم لنا قائمه فكلما زدنا انشغالا بامور ثانويه كلما علا شأن حكامنا لديهم
ومن البدايه كانت فكرة فرق تسد
و فك عقد الشعوب العربيه لانهم كلما تقاربوا كلما زاد تهديدهم لامريكا والتى لم يبق غيرها حاليا كقوه عظمى
و ابنتها غير الشرعيه اسرائيل
لقد اعترف الاسرائليون انفسهم
بهزيمتهم امام فصائل المقاومه
واحنا اللى بنقول فين هو النصر ده
والله العظيم حاجه تحرق الدم.
وزى ما انت قلت المعلومات العلميه بقت فى متناول الجميع
يعنى الموضوع بسيط لو احنا عاوزين
مش احنا كافراد
انما احنا كحكومات
وبما ان التعليمات
تخلف و قهر وجوع وظلم يبقا
حسبنا الله ونعم الوكيل
و ان غدا لناظره لقريب
بس ده لو كان فى ناظره
تحياتى لمجهوداتك

كراكيب عادل said...

هارملس

انا بجي مدونتك وبريح خالص زي المحطة الاخير للقطار كدة المرة دي الوجبة دسمة جدااا لدرجة انها بتفقد الانسان الكلام ههههههههه

انا مش عارف اقولك اية غير انك بتعبر عن حجات كتير جواي مش عارف اشرحها ساعات ومش لاقي حد يصدها ساعات

والاكثرية هم المشكلة الي هما المندهشين جدااااا واتباعهم واصحاب التقليد الاعمي

لو علقت علي البوستات التلاتة هكرر نفس كلامك تاني علشان انا متفق معاك تماما بس انا سافرت امريكا دي وشفت هناك حجات مختلفة عن ما كنت اتوقعة

الشعب الامريكي مفيش حاجة اسمها شعب امريكي دول مجموعات من دول مختلفة

جمعوا كل العقول من كل الدول وتعاملك معاهم في منتهي السلاسة

خدومين صادقين الشغل شغل والهزل هزل

اغلبهم ميعرفش حاجة عننا ولا تفاصيل حياتنا الشعب غير والحكومات غير

كل ولاية كانها بلد تاني مختلف في كل شئ

وزي ما قلت لك مش هختلف معاك في موضوع الحضارة ولا اي شئ بس فية شئ مهم جداا

هما الناس بتوع زمان الي عندنا دول لية كانوا متقدمين وكانوا لهم الريادة في كل شئ ؟؟؟؟؟؟

عدل وعلم وحضارة وانتصارات

يا تري لية ؟؟

Diala said...

Harmless
يسعد صباحك يا سيدي

كما ترى الكل متفق معك و يصدقك وأؤكد لك أن غالبية الشعب العربي أصبح يرى الأمور على حقيقتها و لكن لا تكمن المشكلة في إنعدام الرؤية..بل في إنعدام الإرادة وثقافة الخنوع و الإستسلام للواقع مهما كان مذلا و في أفضل الأحوال الهروب منه بعيدا عن الأوطان إلى غربة لا تسلم منها الروح و لا الجسد

تحياتي

amira said...

تسجيــــل متابعة

ياسمين said...

بجد مش عارفة أعلق
كلامك مظبوط
ومش عارفة ازود عليه ولا انقص منه
ولا انقده ولا امدحه

احنا عشنا كدة و ولادنا بيعيشوا كدة
واكتشفت ان
القومية العربية وهم
الحضارة وهم
التدين وهم

الحاضر هو الحقيقة الوحيدة
تحياتى

Rosa said...

انا من جيل تربى على الكفايه والعدل والاصلاح الزراعى وقانون المساكن والقطاع العام والابره والصاروخ واقوى قوة ضاربه فى الشرق وغيرها وغيرها
وعندما كبرنا اكتشفنا انها خرافات فى خرافات
اعتقد انها لم تكن لتكون من الخرافات اذا من كان قد اسس كل تلك الاشياء مازال على قيد الحياة
اعتقد انها خرافات مع هذا العصر فقط
اراك محظوظ و سيء الحظ في آن واحد محظوظ لأنك عشت تلك الفتره من الكرامه وعزة الوطن والنفس و اكثر سوءا في الحظ لمعاصرتك كل ماهو عكس ذلك الآن
تحياتي لكل ما ورد من تحليلات واستنتاجات
في انتظار المزيد تحياتي

الغالية زوجة المحظوظ said...

انا باه من جيل اتربى ع الحلم الامريكة باصول اسلامية ازاى؟!............. معرفش لكن تقدر تقول فن تعجيز النفس والحلم بالمستحيل وكملت انى اتلقيت نفسى فى وادى واللى حواليا كلهم فى وادى حتى اللى ارتبط دمى بدمهم بيفكروا بشكا وانا بشكل وبرغم انهم معترفين واقنعونى انى مش عايشة على ارضنا الا انهم بيحتكموا لرائى وبيطلبوا منى العقل وتقبل شطحاتهم على اعتبار انى بامنطق الامور يعنى لازم اتعاقب ف كل الاحوال ا-اول مرة اتعاقب بانى ما اتلقاليش طريق معاهم وتانى مرة بانى اتقبل تجاوزتهم ف حقى - غريبة او يمكن انا اللى غريبة
يا سلام لو الواحد تجيله فرصة يلف الكرة الارضية على رجلية مشى بدون مبالغة مشى وبعد كده يبقى يختار ايه المكان اللى ممكن يستوعب سرحانه فى السما ويقربه من اى سحابة معدية :)

harmless said...

جهينة

دائما ارائك جميله ودائما اسلوبك ساحر ودائما معجب بك ودائما انتظر كلماتك

اشكرك

harmless said...

NADA

يا ترى كتبتى ايه؟ ومسحتيه ليه؟ وماكتبتيش تانى ليه؟

فى انتظارك دائما

harmless said...

هانودة

احمد الله ان لازال هناك من يستطيع الوصول للحقيقه من تحت ركام الاوهام واطنان التزييف والحاح الاكاذيب وبريق الاغراءات

اشكرك يا هانوده

harmless said...

فان جوح

اخى ان للتاريخ حركة وتطور لا يوقفهم احد
ريما يعرقلهم او يسرعهم لكن لا يغيرهم

والشعوب كائنات حية تمر بمراحل الكائن الحى
المراهقه والشباب والرجوله والشيخوخه والموت ثم الميلاد من جديد

وربما مصيبتنا اننا مررنا بالمراهقه ايام عبد الناصر ثم فجأة شيخوخه فى عهد مبارك ولكن يبدو ان الشعب يريد ان يتحول الى مرحلة الرجوله بدلا من الموت

الله اعلم

harmless said...

كراكيب عادل

تعجبنى اراءك دائما
وقد حدثت لى الصدمه التى حدثت لك عند اول زيارة لى لامريكا

كانت ليلة عاصفه رهيبه والطائرات تحولت الى مدينة نىوورك بدلا من نيويورك

وعندما نزلت المطار ذهبت الى مكتب الاستعلامات وهو دائرة بدون زجاج فى منتصف المطار وداخلها عدة رجال

والمطار باكمله يتدلى من سقفه يافطات مكتوب فيها
keep your eyes on your bags

واثناء حوارى مع الاستعلامات كان يهتف بى كل لحظه خلى بالك من الشنط

وانا اقوله فيه ايه
ده احنا فى المطار
امال لما اطلع بره حيعملوا فيا ايه

الذكريات كتير مش عايز اطول عليك

harmless said...

ديالا

تكسرت النصال على النصال يا ديالا
الامل فى الله ان ينهى هذا الليل الطويل وهذه الخيانات التى لا نهايه لها

harmless said...

لومى

ما تكبريش نفسك يا لمى
عايز افكرك ان اللى اكبر من حضرتك
اخونا جمال
لسه بيبتدى حياته ولسه بيتجوز ولسه عايز يخلف ولسه بيقدم على وظيفه
اللى احنا واقفينله فيها ومش حنعينه ان شاء الله

harmless said...

روزا

يا ترى ايه الفتره اللى فيها عزة وكرامة اللى انتى بتقولى عليها؟

انا عن نفسى ما شوفتش غير رعب وخوف وناس بتتعذب وناس بتتقلع اظافرها وناس بيغتصبها الكلاب

ولو ما حضرتيش اقرى مصطفى امين او زينب الغزالى او جابر رزق او الحمامصى او احمد رائف ...الخ

ولو مش بتقدرى تتخيلى من القرايه شوفى فيلم الكرنك ولا احنا بتوع الاتوبيس ولا طائر الليل الحزين ..الخ

وانا باقولك بالامانه انى ما شوفتش الا رقابه على وسائل الاعلام وممنوع السفر على كل المصريين الا بتصاريح واللى خارج مولود واللى قاعد مفقود

وماشوفتش الا هزيمة هى اقرب للمهازل ولم تحدث لاى امه فى تاريخ البشريه وده طبعا قاله بعض الخبراء والمؤرخين وشوفت مئات الالاف بيتأسروا وبيستشهدوا واراضينا بتحتل من كلاب البشرية والدنيا كلها بتضحك علينا وممكن تقرى الصامتون يتكلمون والموتى يتكلمون لسامى جوهر ومذبحه الابرياء لوجيه ابو ذكرى ..الخ

كمان ما شوفتش غير مذابح القضاء ورفت شيوخهم وتجويعهم غير رفت الصحفيين واساتذه الجامعه وتجنيد الجواسيس حتى كان الشخص لا يأمن لاخوه

كمان ما شوفتش غير صلاح نصر وحمزة البسيونى وشمس بدران وناس كتير اقرب للكلاب المتوحشه

ما شوفتش غير فقر وضياع قيمة الجنيه المصرى وازمات فى الاكل والبوتجاز والسكر وطوابير جمعيات مالهاش اول من اخر

ماشوفتش غير تليفونات ميته وطرق مكسره وبلاوى لا اول لها ولا اخر

واكيد ربنا رحمنا بانتهاء عهد اللاحرية واللاكرامة اللى بتقولى عليه لانه من 54 ل 70 لو كان فيه خير كان اتعمل لكن ما شوفناش الا تدمير فى تدمير

اما لو تقصدى الكلام والخطب وارفع راسك يا اخى وحنموت وحنكسر وحنرمى فى البحر وباقى الكلام فانا اخيرا اتفق معك فهذه فعلا كانت ايام الكلام الجميل

انا دائما اتجنب الكلام فى المواضيع دى لان حصل فيها تحجر للعقول وكل واحد بقى اللى فى دماغه فى دماغه بالاضافه انه ماضى مافيش داعى نضيع وقتنا فيه لكن برضو حبيت يكون رايى واضح

harmless said...

ياسمين

الحقيقه هى اكبر وهم
دائما ملونه بالهوى وبالرغبات

والانسان عجيب
حتى فى اللعب
نفس المشهد يشهده الجميع ويختلفوا عليه ويراه كل شخص حسب اهواءه ويقسم ويحلف انه كان كذا
والغريب بان لا احد يكذب ولكنه راه هكذا فعلا

والحقيقه صارت وهما
هى دائما وهم

harmless said...

الغالية زوجة المحظوظ

الحكمة ضاله المؤمن يسعى اليها فى اى مكان

ولو الامريكان لديهم من الخير شيئا فلنأخذه

ولكن هل فى الامريكان خيرا؟
بالتاكيد لديهم من الخير الكثير
على الاقل نظام العمل لديهم
والنظام الادارى الذى يمنع اعداء النجاح من عرقله الموهوبين
و ثقافه رفض التزوير او تأليه الحكام

اشياء كثيره جميله لديهم يقابلها جبال من العيوب والبلاوى

فليس من الحكمه ترك الكل ولا من الكياسه قبول الكل

هنا الجنة said...

أنا قريت الثلاث بوستات حرف حرف وكلمة كلمة , وفعلا انا معاك فى كل كلمة قلتها , مفيش مشكلة حقيقية واحدة الإنسان بيواجهها إلا نفسه , احنا فى ايدينا الداء وفى ايدينا الدواء
بس احنا اخترنا نمرض نفسنا بالتلات امراض دول وربنا يعافينا بقى منهم

شيماء الجيزى said...

هارملس

فعلا الموضوع ده دسم جدا جدا
انا عارفه انى مقصره فى حق بلوجك
رغم اعجابى الشديد بيها
بس ممكن تاخد منى وعد؟
ايوة انى ادخل اعمل تقرير مفصل عن البلوج
والبوست ده؟
تسمحلى بده
وهقدمهولك فى تعليق
بس يارب مش تزهق
او تقولى ايه المقال الى انتى كتباه ده
حزينه انى مشوفتش تعليق ليك
بحب توجيهاتك

ارجوك ...زدنى منها
تحياتى ليك

harmless said...

هنا الجنه

اشكرك على متابعتك يا صديقى
كنت قد قلقت عليك لا ختفائك فترة
واتمنى ان لا تنقطع عنى فترات طويله مرة اخرى

harmless said...

شيماء الجيزى

اختى العزيزة
كنت اقلب فى عقلى كلمة لكى و احاول ان اجد صياغه توصل المعنى الذى اريده بدقه

فبدايه اريد ان اؤكد اعجابى المستمر والمتنامى بكى وباسلوبك الصحفى الجميل والحوارات التى تقدميها مع مشاهير المدونين

اتمنى ايضا ان لا تجعلى حواراتك الصحفيه تعوقك عن كتابة بوستاتك الخاصه
فانتى الان تعبرين عن اراء الاخرين فاين ارائك؟

اقترح على اقل تقدير
بين كل بوست وبوست
بوست

زحل الفلكي said...

3 بوستات اجمد من بعض يا استاذنا
بجد

ايوه كده اخيراً فيه ناس عندنا عرب بيفكروا كده في ظل الغسيل الفكري اللي شغال علينا
ومصورلنا امريكا دي بلد التقدم والحرية
وفي نفس الوقت بلد الفسق والمجون
علشان اللي دماغة حريه يحب البلد دي
واللي دماغة فسق ومجون
برضه يحب البلد دي
مش دي البلد اللي جالنا منها الكليبات والافلام والتكنولوجيا

ولكن الحقيقة هي بالفعل زي مذكرت
في كل زقاق وفي كل شارع يوجد المجرمين المتعطشين للدماء
لأن المجتمع لا يهتم اصلا بهم فيتجهوا للجريمة

-----------------
بالنسبة للجزء بتاع الفجوة العلمية ده
فأنا متأكد اننا نقدر نعديها بسهوله
وعندي اكثر من مثال
احنا بننضغط في الامتحانات وبنذاكر مواد مش بنحبها
وبتلاقي نفسك بتذاكر ماده لأول مره بسبب لخبطة الجداول بتاعت الامتحانات
وسبحان الله تلاقي نفسك حالل فيها وتفهمها كويس
طب مابالك بقا لو اتذاكرت بمزاج
وكنت بتحبها
اكيد الامر حيختلف كتير

----------------------
بالنسبة لموضوع اسرائيل ده
انا بقول لنفسي اضعف الايمان
شوف اضعف الايمان
يجري مليون مواطن مصري بس عليهم
واراهنك
حياكلوهم اكل
من غير اسلحة حتى

دي اسرائيل دي حته حشره موجوده محتاجة بس مضرب ذباب

وعلى فكره جيلك تربي على خرفات
بس انا مؤمن ان الخرافات اللي بتقول عليها بتاعت قانون الاصلاح الزراعي و و و و
دي مش خرافات ابداً
وحييجي الوقت اللي يتحقق فيه احسن منها ان شاء الله

loumi said...

ههههههههههههههههههههههههه
ههههههههههههههههههههههههه
ايه السنسكريتى اللى على اليمين فوق ده؟؟؟؟
والله حاولت افك الشفره دى
طلعتلى حاجه معبره جدا جدا جدا
بجد
بجد
بجد
ربنا يخليك

شيماء الجيزى said...

الاخ العزيز

هارملس

سعيده جدا بكلماتك التى احاول جاهده ان اصنعها بواقع ملموس
لكن يا عزيزى الامر اصبح بالفعل صعب
لأننى التزمت بشئ ما احاول ان اعرضه
وانا كما عرف نفسى انسانه ملتزمه بعملها
لا تستطيع التخاذل عنه ابدا

ولكن لطلبك الجميل سوف احاول بأذن المولى

سيدى
احب ان اضع هنا توقيعى
بالاعجاب بفكرك الجميل
وانتظر منى ما وعدتك به

وارجو ان يتقبل سيدى تلميذه نجيبه
تحاول التعلم

تحياتى