تخاريف

مهما النفس تعبت والقلب داب ** وانصرفت الصحبه وراح الاحباب ** وانعدمت الامال وضاعت الاسباب ** حارجع تانى ولو من خرم باب

يا بلدى عجزتى وما اترحمتيش * حتى الكلاب نازله فيكى تلطيش * محنية وموطيه للالاضيش * معروضه للبيع * والكل ما بيشتريش

شوفنا مجنون حكم بلد جنبنا * وشوفنا خاين فى بلد جنب جنبنا * وشوفنا سفاح كان على مرمى بصرنا * لكن حكم الحراميه محصلش الا عندنا

كل ستين سبعين سته يعدوا * تلاقى كل البشر ماتوا واتهدوا * وجه غيرهم وغيرهم يمشوا ويعدوا * واحنا فاكرين ان اعمارنا حيتمدوا * ورضينا بالذل عشان شوية ايام يتعدوا

اموت فى السرير ولا وانا عايم لايطاليا * ولا احلى فى تلج اوكرانيا * لا غرقان فى عباره فى الميه * طب محروق فى اسيوط او المنيا * او ماشى فى قطر درجه تانيه * دبرنى يا ريس واسيبلك الدنيا

تلاتين سنه من غير حروب * ولا مشاكل ولا رمى طوب * والفقر برضو مكتوب * وحسنى خربها تخريب مخراب فهو مخروب

شوفتها النهارده منورة * بضحكه مسكَرة * حلويات مكرره * وعيون جوهرة * بس برضو مخسَرة * اصل اللبس مسخرة * والانوثه متفجَرة * وطول ماهى ورايا * انا حاجيب ورا

إلا ماشوفتلك مرة نصر * إلا كله هزيمه ومرض وفقر * وظلم وغلب وكبت وقهر * وليل طوبل زى الدهر * حل عنا سنه او حتى شهر

نفسى الاقى حد يشكر فى عهدك * او حتى يعجبه شكلك * طيب يا اخى يستظرف دمك * والله بامانه باسال طوب الارض * والكل بيسب فى اهلك

سد ورا سد * فكر مالوش حد * مين ينسى صفع الخد * مين يقف قصاد المد * مين قال هزار مش جد * اكيد ولا حد

الظلم انتشر * والكل انقهر * لا مفترى انكسر * ولا شجاع ظهر * والبلد باينها * ماعدش فيها دكر

كلنا يا اخرس يا اطرش يا مش شايف * بس ايـــــــــــــــــــه؟ * بنمصمص الشفايف